Tura, Lber 16 : U MDC barim ka Balachanda Constituency, Sofior Rehman, ula shah kem ha ki Pulit ha Jylla ha ka step phyrngap sngi Nyngkong halor ka jingjia iakynad pher jaidbynriew kaba jia ha ri-lum Garo.
Kat kum ka khubor Pulit, ia u Rehman la leit kem na Iing ha ka por 1 baje mynstep na New Bhaitbari, kaba hap hapoh ka Rajabala Police Station, West Garo Hills District. La leit kem ia u da ka kynhun Special Team na Tura Police Station.
Ia kane ka jingkem la pynthikna ruh da u Superintendent of Police ka West Garo Hills, Abraham T Sangma.
U SP u iathuh ba ka jingkem ka dei halor ka jingkynnoh ba u dei ma u, uba kynshoit bad pynshit ba lam sha ka jingiakynad pher jaidbynriew ha ka thain ri-lum Garo.
Ki Pulit ki la ong ba ki jingthoh ha ki social media bala kynnoh ba dei jong u Rehman, ki dei kiba nang aiding ia ka jingiakynad pher jaidbynriew ha ka thain. Ia kine ki jingthoh la pynphriang kylleng ki jaka bad ngeit ba ki dei kiba nang aiding ia ka jinglong jingman kaba lam sha ki jingkulmar bad jingiaumsnam ha ki katto katne ki jaka ka ri-lum Garo.
Ha kajuh ka por, kila don ruh bun ki ejahar bala mudui pyrshah ia u Rehman bad ia u MLA barim SG Estamur Mominin, ba kynnoh ba kila kren pynshit bad aiding ia ki paidbah, kaba lam sha ka jingiakynad jaidbynriew ha ka thain.
