Williamnagar, Naitung 24 : Ki Pulit ka Jylla kila kem ia uwei u briew halor ka jingsuba ba u dei uba rahbor ia i khynnah kynthei ba dang 6 snem, iba la jah rngai nala iing na Rajasimla ha ka 18 tarik Naitung mynsngi.
Ia une u briew la tip kyrteng da u Sonjith Arengh, uba la jah rngai naduh ka sngi ba jia kane ka jingjah rngai, ong ki Pulit.
La iathuh ba u Arengh ula sahmiet ha ka 22 tarik Naitung ha ka thain Rongjeng bad nangne ula leit sha Adokgre Mitegitim ha ka sngi ba bud. Halor ka jingioh ia ka khubor ba thikna, ki Pulit kila poi ha Mitegitim ha ka por 6:30 baje hynnin ka janmiet ban kem ia u. Hynrei, u Arengh ula phet krad mar syn iohi ia ki Pulit.
Hynne ka step sngi Palei, ki nongshongshnong ka Adokgre Mitegitim kila bat ia une u briew ha ka por 7 baje mynstep bad kila aiti noh ia u sha ki Pulit ha ka por 11 baje mynsngi. Une u briew u don mynta ha ka kti ki Pulit ka Kharkutta Police Station bad ka jingtohkit kala iaid shakhmat.
Ki Pulit kila pyntip ba ia u Arengh yn sa iatam tian bishar lashai ka sngi hakhmat ka Iingkashari.
Ka khubor ka iathuh ba u Sonjith Arengh u dei u briew uba la donkti teng ha ki kam bymman bad u dei uba la shah pynngat teng ruh ha ka ain Protection of Children from Sexual Offences (POCSO) Act.
Ha u snem 2017, ula shah pynngat hapoh ka case POCSO ha Kharkutta Police Station hynrei ula ioh jamin noh kat haduh ka por bala kem biang ia u.
