Nongpoh, Rymphang 28 : Ki Pulit ka Anti Terrorism Squad bad ki Pulit ka Ri-Bhoi, kila iohkem ia arngut ki uba dkhot ka HNLC kiba kynnoh ruh ba ki dei ki nongshna bomb IED bad kiba iaid pynrung dkhot ia ki samla sha ka Seng lyngba ki social media.
Kine ki arngut ki kyrteng u Benjamin Sohtun (34) ba na ka shnong Pahamlapong, kaba don marjan ka Nongpoh lem bad u Jenesis Sohkhwai uba dei na ka shnong Umsohbar, kaba don ha ka thain Patharkhmah.
Ki Pulit ki iathuh ba ia u Benjamin lah ioh ban kem ha ka 23 tarik Rymphang hadien ka jingioh jingtip kiba thikna ia ka jingkynnoh don jingiadei bad ka HNLC bad ka jingpynbiej ia ki samla ban rung dkhot sha ka HNLC da kaba pyndonkam ia ki social media.
Ki iathuh ba ha ka jingtohkit, u Benjamin ula phla ia ka jingdonkti lang u Jenesis Sohkhwai bad phla ruh ba baroh arngut ki dang thmu ban shna ia ki bomb Improvised Explosive Devise (IED).
Ki Pulit ki suba jur ba kine ki arngut ki dei kiba buh ia u bomb IED dang shen ha Iew Umsning. Ka jingtohkit ia kane ka kam ka dang iaid mynta.
Ia kine ki arngut la register case ha Nongpoh Police Station hapoh ka kyndon 113(3)/147/148 BNS. Ka jingtohkit mynta kala nang iaid ban lapdien shuh shuh sa ia kiwei pat ki briew kiba don jingiadei bad ka seng HNLC ha ka thain bad ka District.
