Shillong Naitung 25: U Superintendent of Police jong ka East Khasi Hills u Bah Sylvester Nongtnger, hynne ka Sngi Baar, ula pyntip ba ki pulit kila kem ia ki 3 ngut ki briew bad bat ia 2 ngut ki Khynnah kiba donkti ban pynhuri hura, shoh bad lute ia ka Nongdie dukan bad ia u Khun jong ka ha Mahadev Khola.
“Hadien ba ngi la dep ban khmih bniah ia ki video lyngba ka CCTV kaba la don ha phyllaw jong ka jaka mane, ngi la lah ban ithuh ia kiba donkti ha katei ka jingjia bad haka miet jong ka Sngi Nyngkong ngi la pynlong iaka jingthwet bad iohkem ia ki 3 ngut ki briew ryngkat bad 2 ngut ki khynnah rit” la ong u SP haba iakren bad ki nongthoh khubor.
Ula iathuh ba ki pulit jongka Lumdiengjri Police Station, kila dep ban rejistar case ia katei ka jingjia bad kumta ia ki 3 ngut kiba la shah kem yn sa rah shapoh iingkashari bad ia ki ar ngut ki khynnah rit yn sa leh ia kaba donkam katkum ka Juvenile Justice Act.
U Bah Nongtnger ula iathuh baka jingtohkit ka dang iaid shakhmat bad ia kine ki 5 ngut yn sa tian bishar kat kum ki kyndon aiñ.
Katba u SP City u Bah Vivek Syiem ula iathuh ba katei ka jingjia kala jia sted bha bad kala sdang na uwei u khynnah uba leit pan jingdih Amul Kool na ka dukan ba shong ka Longkmie hynrei haba kane ka Longkmie kala kyntait ban ai, une u Khynnah ula phet noh bad tang hadien katto katne por, ula wan phai biang lem bad 4 ngut kiwei pat.
Ula ong, ba kane ka Longkmie bad u khun kila shah ktah kti ha kine ki briew bad wat ki briew kiba pyrshang ban iarap ia ki ruh kila shah shoh lang.
U SP City ula pyntip ruh ba ka don ka jingpyrshang ha ka social media ban pynman kam thombor ia ka niam halor kane ka jingjia namar b aka jia hajan ka jaka mane blei. Ula ong ba kane ka jingjia kam don jingiadei eiei ruh em bad ka kam niam.
“Ka dei ka jingiashoh iadat kaba mih na ka jingiania hapdeng jong ki bad kam don satia kano kano ka jingleh donbor ia ka niam lane ka jingngeit niam” ula ong.
Haba kylli, u Bah Vivek ula pyntip ba ki Pulit kin dang ban pynthikna la kine ki khynnah ki dei ne em ki dkhot jong kino kino ki kynhun senghalang. “Ia mynta hi ngim pat lah ban pynthikna bad ngin sa tohkit ha baroh ki liang” ula bynrap.
