Shillong, Jylliew 22 : Ki Pulit ka Mawlai Police Station ha ka sngi U Blei, kala ioh ban kem ia kawei ka briew kaba donkti ha ki kam pajut soh skhor ksiar jong ki Khynnah skul ha ka thain Mawlai.
Kane ka kam bymman kane ka briew la paw paidbah hadien ka jingsaphriang ka video bala ioh ring lyngba ki bor CCTV na kawei ka Iing ha Mawlai Nongkwar.
Kat kum kane ka video bala saphriang ha ka 21 tarik Jylliew, la pyni ba ha ka janmiet 18 tarik Jylliew, kane ka briew (bym pat ioh kyrteng), kala pynsangeh ia iwei I Khynnah skul ha Mawlai Nongkwar bad kala law ia baroh artylli ki jingdeng soh skhor jong ine I Khynnah hashuwa ba kan phet krad na katei ka jaka.
Ki Pulit ka Mawlai haba ioh jingtip ia kane, kila leit ban pynlong ia ka jingtohkit da ka jingiarap ka Video CCTV, kila ioh ban kem ia kane ka briew.
Ki Pulit ki suba ba dang don sa kawei pat ka paralok jong kane ka briew, kaba ju donkti lang ha kum kane ka jait kam bad mynta ka jingtohkit ka dang iaid shakhmat ban lapdien ia kane ka briew.
