Shillong, Lber 16 : Ki Pulit ANTF hynne ka sngi palei, kila ioh kem ia kawei ka longkmie kaba dei na Mizoram, nangne na Shillong halor ka jingdonkti ha ki kam shalan droks sha Jylla.
Ia kane ka longkmie ba kyrteng ka Lalthazuali Ralte la kem na ka iingshongwai jong ka na Demthring, Madanrting da ka jingiarap ki Pulit ka Madanrting Police Station.
Ia kane ka longkmie la ialam noh sha Lad Rymbai ban kem ia ka halor ka jingdonkti ha ki kam shalan droks, ong u Additional Superintendent of Police ka EJH bah B Jyrwa.
Kane kala wan jia hadien ba ki Pulit kila kem ia u Lalduhwami Ralte, uba pynkit ia u droks na Mizoram sha Shillong da kawei ka Tata Sumo Tourist kaba don u nombor Ml05-K-2432.
Ia kane ka kali lah ioh bat ha Ladrymbai hajan ka Friend Hotel hadien ka jingkhynra bala pynlong kat kum ka jingioh khubor syntiat kaba paka bha.
Ki Pulit kila kem haduh 55.68 gram u heroin na ka pla jong u Lalduhwami.
Halor kane ka jingiohkem, ki Pulit kila wan hiar mardor sha Shillong ban kem ia ka Lathazuali, kaba pyniaid bad kaba pdiang ia une u jingdih buaid, ong u bah Jyrwa.
Ki Pulit kila register case ia kane ka jingjia ha Khliehriat Police Bazaar bad ka jingtohkit mynta ka dang iaid shakhmat.
