Shillong, Naitung 26 : Ki Pulit ka East Khasi Hills, kila ioh ban kem haduh 7 ngut ki snar nongtuh thuk thuk bad ioh ruh ban kurup ruh haduh 4 tylli ki Pulsar kiba la rong tuh na East Khasi Hills District.
Kat kum ka jingpyntip ki Pulit, 3 ngut na kine ki nongtuh la ioh ban kem na Amlarem, 3 ngut la ioh kem na Pynursla bad uwei la ioh kem na Shallang.
U Superintendent of Police ka East Khasi Hills Bah Sylvester Nongtnger u pyntip ba ki Pulit ka Mawngap Police Station kila ioh pdiang ia ka ejahar ha ka 15 tarik Naitung ba shah tuh kawei ka thuk thuk ML05-P-6045 na Umlympung, 12 Mer, Mylliem bad mar mar kila register case bad pynlong ia ka jingtohkit.
U pyntip ba halor ki khubor syntiat, ki Pulit kila pynlong ia ka jingapshrip ia kine ki nongtuh bad la ioh ban kem ia lai ngut na Amlarem ryngkat bad la ioh kurup ruh ia kane ka thuk thuk na shnong Padu, Amlarem.
U pyntip ba nalor kine ki laingut, ki Pulit kila kem ruh sa lai ngut pat ki runar na Pynursla kiba iadonkti lang ha kane ka kam tuh thuk thuk.
U Bah Nongtnger u pyntip ba ha ka jingtohkit shuh shuh, ki Pulit kila ioh ban kurup biang sa kawei ka Pulsar 150 na Amlarem bad kawei pat ka Pulsar 220 na Pynursla, ki bym shym la don satia ia u nombor plate bad hadien la pynthikna ba kine ki thuk thuk ki dei kiba tuh na Amparem bad Pynursla.
Nalor kane, u pyntip ba ha ka 25 tarik pat, ki Pulit ka Laban kila iohpdiang ia kawei ka ejahar ba shah tuh ka Pulsar 150 cc ba don u nombor ML05-V-0993 na Lower Harisabha, Laban.
U iathuh ba halor ki jingioh khubor, ki Pulit kila ioh ban kem ia uwei u runar na Shallang bad ia kane ka thuk thuk ruh la ioh ban kurup na katei ka jaka.
Ki Pulit kila kurup ruh noh ia kine ki thuk thuk lem bad ia kawei ka Alto 800 ba don u nombor AS01-DH-2009 kaba la pyndonkam da kine ki runar ha kaban leh ia kane ka kam bymman.
U Superintendent of Police u pyntip ba ki dang don ki briew ba donkti ha kane ka kam kiba la phet rieh mynta bad ka jingthwet kala iaid shakhmat ban iohkem ia ki.
