Shillong, Iaiong 22: Ki pulit jong ka East Khasi Hills, hynne ka sngi Ba-ar, kila iohkem ia 5 ngut ki samla kiba la donkti ha ka kam tuh thuk thuk na ka nongbah Shillong.
U Superintendent of Police jong ka East Khasi Hills u Bah Vivek Syiem ha ka kyrwoh khubor ula pyntip ba hynne ka step phyrngab, kila don ar tylli ki Bike R15 kiba la shah tuh na ka shnong Sunny Hills bad 3rd Mile, Upper Shillong.
Ia kane ka jingjia, la pyntip sha ka kynhun ki pulit kiba la ap pahara ha ka por mynmiet ha kylleng ki jaka bad ia ka bike kaba la tuh na Upper Shillong la ieh noh ha ka jaka kaba don ha Sangmein katba ia kawei pat ka Bike la ioh ban bat da ka kynhun pulit ha ka thain Pynursla.
Uwei na ki nongtuh thuk thuk ula ioh ban phet krad da kaba ryngkoh noh katba uwei pat uba la tip kyrteng kum u Nironton Tangsong 24 snem ka rta, na Mawryngkang ula shah kem noh.
U iathuh ba ka Special Cell EKH haba buddien ia kane ka jingjia, kala ioh kem sa ia ki 4 ngut kiba donkti ha ka jingtuh ia ki thuk thuk kiba kynthup ia u Pius Talang 19 snem ka rta uba na ka shnong Pyrdiwah, u Lovingstar Surong 18 snem ka rta na Pynursla, u Balajied Mawiong 19 snem na Pynursla bad u Banpynskhem Mukhim 19 snem ka rta na ka shnong Pynursla.
Kane ka kynhun ki nongtuh kadei kaba la donkti ha kaban tuh ia ki thuk thuk bad la pyntip ba ha ka sngi Balang yn ialam ia kine ki 5 ngut kiba la shah kem sha ka iingkashari.
