Shillong, Jymmang 15 : Ki Pulit ka Basistha Police Station, kila ioh kem ia 5 ngut ki nongtuh, kiba pynjah klep ia kawei ka trok kit mar kaba mih na Guwahati sha Silchar ha ka jingkhynra bala pynlong ha Assam bad Meghalaya.
Ki Pulit kila ioh ruh ban kurup ia ka mar ba shongdor T. 43 lak na Shillong, East Khasi Hills District bad ia ka trok kaba don u nombor AS26AC0874, kaba jah rmgai, lah ioh ban kurup najan ka Lalong Tollgate, Jowai.
Kane ka trok kit mar kala mih na Guwahati ha ka 28 tarik Iaiong bad kala jah rngai naduh katei hi ka sngi.
Haba shimkhia ia ka jingujor bad ka jingsuba ba dei hi u nongniah ka trok bad ki paralok jong u, kiba leh ia kane ka kam, ki Pulit ka Basistha kila pynlong mar mar ia ka jingtohkit kaba bniah bad halor ki jingtip kiba paka, kila ioh ban kem ia arngut na kine ki nongtuh na ka thain Khanapara.
Kine ki arngut ki kyrteng u Ekram Hussain aka Imran (22) bad u Hafizur Miya (27).
Da ka jingtohkit ia kine, ki Pulit kila hiar khynra ha ka Shnong Saradiya, Barpeta, kaba lam sha ka jingiohkem biang sa ia arngut ki nongtuh kiba donkti.
Kine ki arngut ki kyrteng u Babul Hoque (27) bad u Jiyarul Islam (29).
Haba pynshong nongrim ia ki jingphla kine ki runar, ki Pulit hadien kila ioh ban kurup noh ia ka mar na Shillong, East Khasi Hills. Ia kine ki mar lah ioh ban kurup na uwei u briew uba kyrteng u Rakesh Kumar Mahato (33).
Ki mar kiba la ioh kurup ki kynthup ia 3 tylli ki barrel (210L), 6 tylli ki Crompton fans, 283 cartons ki mar Marico, 50 tylli ki lubricant urea buckets, 12 tylli ki jain phong, 2 synduk ki tiar electric, 3 carton ki marvDabur, 67 carton ki Colgate, 5 cartons ki mar 3M bad 5 cartons ka Real Juice.
Kine ki 5 ngut kila don mynta hapoh ka jingtohkit.
