Shillong, Lber 17 : Ki Pulit ka Jylla kila ioh kem ia 4 ngut ki briew kiba donkti ha ka kam tuh thuk thuk bad lyngba jong ki, la lap ia ka jaka riehtngen hapoh ka Iing ba dang shu shna ha Ladrymbai, East Jaintia Hills bad ioh kurup ia artylli ki thuk thuk bad ki tiar ba loit na ki kali arshaka.
U Superintendent of Police ka East Khasi Hills Bah Vivek Syiem ha ka sngi Ba-ar ula pyntip ba ki 4 ngut ki briew bala kem da ki Pulit ka Jowai, kila kubur ba kila rong tuh ia artylli ki Yamaha R15s bad ka Scooty na Shillong.
Kine ki briew kila ialam ia ki Pulit sha kawei ka iing ba dang tei ha Ladrymbai bad kila ioh kurup ia artylli ki thuk thuk bad ki tiar ba loit na ki thuk thuk.
U iathuh ba kane ka jingkem kala wan jia hadien ka jingioh bat ia u Shabamutlang Syiemlieh myn ha ka 2 tarik Lber, halor ka kam tuk ha ka thain Golflink.
Hadien kane, ki Pulit ka Jowai kila kem ia u Vencentstar Tongwah ba na Nongmynsong, Lumshyiap, Kitborlang Mawlong uba dei na Mawsiatkhnam, Royalroy Lyngdoh ba na Mawsiatkhnam bad u Aryan Kharthangmaw uba dei na Mawhati halor ki case kiba la register ha Laitumkhrah bad Sadar Police Station.
“Ha ka jingtohkit, kine ki briew kila kubur ba ki dang dep tuh dang shen ia kawei ka Yahama R15 na ka thain Umroi, kawei ka Yahama R15 na Goraline, Laitumkhrah lem bad kawei ka Scooty na Golflink” ong u Bah Vivek.
Kane ka kynhun kala phla hakhmat ki Pulit ba kila leit aiti ia kine ki thuk thuk sha uwei u briew ha Ladrymbai.
Ka kynhun Pulit na East Khasi Hlls kila leit khynra ia kane ka Iing ha Dongwah, Ladrymbai bad kila ioh kurup ia ka Yamaha R15 (ML05-AB-2991_, ka Yamaha RayZ (ML05-AE-1478) bad ki tiar jong kawei pat ka R15 bad ka scooty-bala song ha byrni, “kiba thmu ban pyniaid iew noh”.
U Bah Vivek u iathuh ba ki don bun ki tiar kali arshaka kiba la shem ha kane ka jaka bad ki ban dang pyniahap bad ki thuk thuk ba shah tuh bad ka jingtohkit mynta ka la iaid shakhmat.
