Dibrugarh, Sept 22: Ki pulit jong ka Dibrugarh hynne ka sngi Thohdieng, kila ioh kem ia ki 3 ngut ki kynthei Naga ryngkat bad 348 gram uba la suba jur udei u Heroin na ka thaiñ Joypur Dibrugarh District, Assam.
Utei u drok uba la suba jur udei ua shongdor T.1.5 Klur uab la ioh kurup da ka kynhun ki pulit.
Katkum ka khubor ba la iohlum na ki pulit, la iathuh ba kitei ki 3 ngut ki kynthei kila rah ia une u jingdih na Dimapur bad iaid lyngba ka Duliajan ban leit sha Arunachal, hynrei kila shah bat noh ha ki pulit jongka Joypur bad la ioh ban kurup ia une u jingdih uba don 348 gram uba la thep hapoh jong ki 29 tylli ki synduk sabon.
“Ki dang shong ha ka kali kaba don ia u nombar AS-06AJ5275 ban leit sha Arunachal Pradesh. Ngi la ioh ia ki jingtip halor ka leit ka wan ka jongki bad ngi la pynlong ia ka jingkhynra hapoh jong ka Joypur Police Station. Ngi la bat ia ki 3 ngut ki nongdie drok bad kurup ia u jingdih uba suba jur udei u heroin na kamet ka jongki” ong u heh pulit ophisar.
Ki pulit ka Dibrugarh kila pyllait ruh ha ka X da kaba ong, “Ka kynhun ki pulit ka Joypur PS hapoh ka jingialam u OC Joypur bad Dy SP Namrup la ioh ban kurup ia ki 29 tylli ki synduk buh sabon ia kaba la buh ia u jingdih uba suba udei u heroin uba don 348 gram bad la kem ia 4 ngut ki nongdie drok.Ia ka kali kaba ki pyndonkam ruh la dep ban kurup lang”.
U nongniah jong katei ka kali ruh ula shah kem lang bad ki 3 ngut ki kynthei na Arunachal Pradesh ha kaba iadei abd katei ka jingjia.
Ki pulit kila rejistar case halor kajingioh kurup ia u Heroin ha Joypur police station kaba don ha Dibrugarh District jong ka jylla Assam.
Ia kine ki briew kiba la shah kem la pynngat ia ki hapoh ka kyndon 21(C)/29 jongka NDPS Act.
“Ngi la sdang iaka jingtohkit bad mynta kine ki 3 ngut ki kynthei ki don hapoh ka jingtohkit jong ki pulit. Ia mynta ngim pat lah ban ong eiei halor kane ka jingjia” ong u heh ophisar pulit.
Ki tyllong khubor kila iathuh ba ka jur bha ka jingpyndonkam ia u drok namar ba bun ki samla ki donkti ha kaban die bad ban dih drok.
Ki pulit ka Dibrugarh kila pynjur ia ka jingkhynra ha kaba kila ioh ban kem ia ki nongdie drok bad kurup bun bah u drok.
