Shillong, Nailar 22 : Ki Pulit ka Jowai kila ioh ban kem ia lai ngut ki nongtuh kali hadien ka jingioh kurup ia lai tylli ki kali ba shah tuh, na ka khlaw ha ka thain Demthring, West Jaintia Hills, ha ka step sngi Thohdieng.
Halor ki jingtip ba thikna, ka kynhun Special Cell ka Jowai DEF hapoh ka jingialam u Addl SP Jason Myrom, kala pynlong ia ka jingkhynraha ka khlaw Demthring bad kila ioh bat ia kawei ka kali Alto K10 ba don bun ki tiar kali.
Ka jingtohkit ia ki briew ba shong ha kali, kala lam sha ka jinglap pat ia lai tylli ki kali arshaka Yama Cygnus Ray ZR ba don u nombor ML05-V-4471, ML05-Y-5008 bad ML05-AC-0799, bala buhrieh hapoh ka khlaw.
U Superintendent of Police ka District Jagpal Singh Dhanoa ula iathuh ba kine ki laingut kiba la ioh kem ki kyrteng u Jopparson Rabon(24) ba na Thangrain, Meshanki Langstang(22) ba na Thangrain bad u Paulme Sungoh (21) ba na Wahnangbah lawmusiang.
U Rabon u dei uba niah ia ka kali AltoK10 khlem ka numbor plate katba u Langstang ula shong lang ha ka kali bad u Sungoh pat la shem na ka khlaw ba marjan ka thain Demthring, ka jaka bala buhrieh ia ki kali arshaka.
Ha ka jingtohkit, kine ki briew kila kubur ia ka jingdonkti ha ka jingtuh ia ki kali na ka thain Laban bad Jhalupara, Shillong, ong u SP.
U iathuh ba ia kine ki kali arshaka bad ia ka AltoK10 bala pyndonkam ha kane ka kam bymman, la kurup noh da ki Pulit bad la wanrah sha Jowai Police Station ban ioh pynlong shuh shuh ia ka jingtohkit.
