Shillong, Lber 16: Ki Pulit ka East Jaintia Hills kila ioh kem ia 3 ngut ki briew bad ioh kurup palat 150 gram u ganja hynne ka sngi Balang.
Ki Pulit kila ioh bat shuwa ia kawei ka kali Honda City AS06V 8941 bala niah da u Laxmindar Gour bad ioh kurup ia u ganja ba khia 84 kg katba ki dang talasi kali ha Dancherra, Kuliang, NH-6, ong u Additional Superintendent of Police Bah B Jyrwa.
Na kane kajuh ka jaka, ki Pulit kila ioh kem sa arngut ba kynthup ia u Md Hachan Mia (37) bad Ajir Hosen (35) kiba dei na Tripura hadien ba kila ioh kurup haduh 77kg u ganja bad ka kali Mahindra KUV 100 (AS 12 P 2301).
U pyntip ba ki Pulit kila pyndep lut ia ki jingdonkam baroh kat kum ki kyndon ka NDPS Act ha ka jingiadon ryngkat ki nongsakhi shimet.
Ki Pulit kila register case ia kine ki lai ngut ha Lumshnonh Police Station bad ka jingtohkit mynta kala iaid shakhmat ban lap ia ka thymmei bad ka tduh jong kane ka kam khaii.
