Shillong, Jylliew 08 : Ki Pulit ka East Khasi Hills, kila kem ia arngut ki briew kiba la kynnoh jrong kti khlem akor ia kawei ka Khynnah kynthei ha khlaw Risa Colony.
U Superintendent of Police ka East Khasi Hills Bah Sylvester Nongtnger hynne ka sngi Palei, ula pyntip ba arngut ki briew la lah ban ithuh bad la kem na Khliehshnong Malki ha ka sngi Balang bad sa uwei pat la lah ban ithuh bad sa kem noh shen.
Ia kane ka case la register hapoh ka Laitumkhrah Police Station.
U Bah Nongtnger u iathuh ba hadien ka jingioh khubor na u Secretary ka Shnong Risa Colony ha ka 3 tarik Jylliew, ba don ki briew kiba thombor ia kawei ka Khynnah kynthei hapoh ka khlaw, ki Pulit ka Laitumkhrah kila her wut wut sha katei ka jaka bad shem ba kawei ka Khynnah bad uwei u samla ba 18 snem, kila leit iaid kai sha katei ka Khlaw bad shah thombor ha ki lai ngut ki briew.
Kine ki briew kila byrngem byrsit ia ki ba kila wan rung sha khlaw bad kila dawa ruh ban siew ia ka kuna.
U iathuh ba arngut na kine ki runar kila shoh ia ki samla shynrang katba uwei pat ula don bad kane ka khynnah kynthei. U pyntip ba une u samla shynrang ula kyrpad ban shah ia kane ka Khynnah kynthei ba kan leit noh bad ba u kloi ban leh ia kaei kaba ki dawa hynrei la pynbor ia baroh arngut ba kin law lut ia ki jain ki nep ba ki phong.
Une u heh Pulit u pyntip ba kine ki runar kila lute lut ia baroh ki jingdon jingem jong ki. La ong ha ka por ba kine ki arngut kila shoh la dat ia une u samla, une u samla ula lait phet sha shnong bad ula pyntip ia ki nongshongshnong ka Risa Colony ba kin ai jingiarap.
Une u Heh Pulit u pyntip ba kine ki laingut ki runar ula leh khlem akor ia kane ka khynnah kynthei.
