Shillong, Rymphang 06 : Arngut ki trai par kila Shah kem haba iadei bad ka jingbthei bomb ha ka par tih dewiong beain ha Thangsko, East Jaintia Hills, kaba la shim ia ka mynsiem ki 18 ngut ki nongbylla.
“Ngi la kem ia arngut ki briew ba iadei bad kane ka jingjia” ong u Superintendent of Police Vikash Kumar ha ka sngi Thohdieng.
Ula kular ba ki Pulit kin thwet tyngeh ban iohkem ia baroh ki briew kiba don bynta ha kane ka jingjia.
Kane ka jingjia kala jia ha Mynsngat, Thangsko, kaba hap hapoh ka Umpleng Police Outpost, ha ka sngi Palei ka 5 tarik Kyllalyngkot.
Haduh 18 tylli ki metiap lah ioh ban sei na kane ka par ba bthei bomb.
Uwei u briew ula mynsaw bad la pynkit sha hospital ha Shillong ban ai jingsumar ba paka.
Ka Kynhun ai jingiarap na ka National Disaster Response Force (NDRF), State Disaster Response Force (SDRF), bad Special Rescue Team (SRT) kila don ha ka thain ban iarap wad ia ki briew ba dang jah.
Ki Pulit kila register ia ka suo motu FIR bad ka jingtohkit mynta kala iaid shakhmat.
