Shillong, Nailur 21 : Ki Pulit ka Shillong, kila ioh kem ia 2 ngut ki runar kiba donkti ha ki kam lute da kaba sei tiar pynmynaw ha Shillong.
Kine ki arngut ki kyrteng u Max Eric Syiemlieh (25) bad u Melvon Tongwah (22), iathuh u Superintendent of Police ka East Khasi Hills Bah S Nongtnger.
Ka jingioh kem ia ki ka long hadien ka ejahar bala mudui ha Sadar Police Station myn ha ka 18 tarik Nailur, ba iadei bad ka jinglute kaba jia ha ka 14 tarik Nailur.
Une u nongmudui ula pyntip ba hadien ba ula khang ia ka dukan ha katei ka sngi, ula shah khang lynti ha ki lain gut ki briew kiba wan da lai tylli ki scooter hajan ka skul Little Blossom.
Kine ki briew kila sei tiar bad byrngem ia u hashuwa ba uwei pat un wan da kawei ka scooter bad sei ia u nar rod.
Kane ka kynhun kala khynra ia ki jingdon jingem jong une u nongmudui bad lute ia ka pisa ba T.10,200 kaba dei ka pisa ba die tiar, ong u SP.
U pyntip ba ki Pulit kila register case ia kane ka ejahar bad ka jingtohkit, kila iohksai bad ioh kem ia arngut na kine ki runar ha ka 20 tarik Nailur.
Nalor kane, u SP u pyntip ba kine ki arngut ki runar ki dei ruh kiba don jingiadei bad ka jingpyrshah lute ha Hideaway Café myn ha ka 16 tarik Nailur, ha kaba uwei u briew ula shah shoh ha ki.
Ka jingtohkit mynta kala iaid shakhmat ban iohkem sa ia kiwei pat kiba donkti lang ha kane ka kam bymman.
