Shillong, Naitung 17: Ki pulit ka East Khasi Hills ki la kem ia 2 ngut ki briew kata u Kenny Kharmujat (24 snem) bad u Subroto Baidya (32 snem) kiba na Lumshyiap, Nongmynsong, kiba donkti ban pajut jingdeng ksiar haki thain Polo haka 16 tarik.
La kynnoh ba kine 2 ngut ki la pajut ia kawei ka ksiar na uwei u briew bym lah ban ithuh, uba la suba ba u dei u nongdih drok bad ki la phet krad sha ki thain Khyndai Lad lyngba ka Jail Road.
Lyngba ka jingtip ba thikna, ka kynhun pulit ba la ialam da u SI I Warjri ryngkat ka jingsynran lang u UBC/AD Sangma bad ki Pulit Central Reserve Police Force (CRPF), ki la bud dien bad kem ia kitei ki runar hajan ka Kim Hyundai Showroom, Golflinks haka por 11:45 baje mynmiet.
Na ka kti jong u Kenny Kharmujat la ioh kurup ia kawei ka ksiar.
U Superintendent of Police (SP) City u Bah H Kharkongor u la kyrpad ïa ki nongshong shnong kiba lah ban shah tuh dang shen lane shah tuh jingdeng ksiar ba kin wan shakhmat bad ujor da ka ejahar ha thanat Sadar.
“Kane kan pynlah ia ki pulit ban leh ia kaba donkam bad ban pynsuk ban pynphai biang ia ka ksiar ba la ioh kurup sha u/ka trai ba dei hok” u la ong.
“Ki pulit jong ka East Khasi Hills ki dang ïai bteng ban pyntreikam stet, hok, bad khuid ïa ka aiñ bad ki kyntu ïa ki nongshong shnong ban ïarap iaki Pulit ban pynthikna baki lanot kin ioh iaka hok” ula bynrap.
