Shillong, Jymmang 14 : Ki Pulit ka Assam kila kem ia u District Transport Officer (DTO) ka Williamnagar, East Garo Hills, u Gene Kelly G Momin hynnin ka sngi Saitjain, namar ka jingkynnoh donkti ha ka jyrsieh ban pynbiang ia ki kot ki sla jong ki kali tuh.
Kane ka jingkynnoh donkti u DTO kala mih pyrthei hadien ka jingkem ki Pulit Assam ia uwei u nong Assam u Golam Ali ba ju khot sin u Sootoo, uba ju khaii ia ki kali tuh. U Golam u dei na ka shnong Bhatipara, Goalpara District.
Halor ka jingioh ia ka jingtip ba thikna, ki Pulit ka Assam kila leit kem ia u Golam Ali ha ka sngi Ba-ar bala lah bad kila ioh ruh ban kurup ia kawei ka kali.
Ha ka jingtohkit, ki Pulit kila lap ba u Golam u ju donkti ha ki kam khaii ia ki kali tuh da kaba pyndonkam ia ki kot ki sla ba shna thok. Nalor kane ka kali, ki Pulit kila ioh ban kurup biang sa lai tylli ki kali ba don ia ki kot ki sla ba shu shna thok.
Ka jingtohkit kala lap ruh ba u Golam u ju khrut noh ia ka nombor chesis jong ka kali ba shu tuh bad leh registration thymmai ia u ha ryngkat ka jingiadonkti jong u DTO ka Williamnagar bad kiwei ki Nongtrei Sorkar hashuwa ban die ia kine ki kali.
U Superintendent of Police ka Goalpara VV rakesh Reddy u iathuh ba ha ka jingtalasi ia u Golam bad ia ka kali jong u, ki Pulit kila ioh ban kurup haduh 4 tylli ki Resgistration Certificate (RC). U iathuh ba ha ka jingpynshisha, la lap ba kine ki RC ki dei kiba shu shna thok kynthup ia u nombor chesis , nombor engine bad kiwei kiwei.
“Ngi la pynthikna ruh na ka NCRB portal bad kurup noh ia ki kali. Ha ka jingtohkit u Golam ula phla ba ula leh ia kane ka kam da ka jingiarap u DTO ka Williamnagar. Hadien ba ngi la lum ia baroh ki sakhi satar, ngi la leit kem bad ialam noh ia u DTO shane” ong une u Heh Pulit.
Une u Heh Pulit ula ai khublei ruh ia ki Pulit ka Jylla Meghalaya kiba la ai ia ka jingiatreilang ha ka jingkhynra hynnin ka sngi.
