Guwahati, Nailar 17 : Ka kynhun Special Task Force ki Pulit ka Assam bad Wildlife Crime Control Bureau (WCCB) ha ka sngi Balang, kila kem ia arngut ki briew kiba dei shikmie shikhun halor ka jingdonkam ban khaii tuh ia ki snieh mrad khlaw.
Ia kine ki arngut la kem na West Karbi Anglong bad ka Shillong. Kine ki briew ki kyrteng ka Rindik Teringpi bad u Khun u Nida Singh Senar. Iaka Rindik la kem na West Karbi Anglong katba ia u Nida la kem na Shillong.
Ka kynhun kala ioh ruh ban kurup ia ki snieh kyrbei na kitei ki briew.
U Kalyan Pathak, Additional SP, STF ula ong, ” Ha ka sngi Balang, ngi la kem ia arngut ki briew halor ki kam khaii tuh ia ki snieh mrad khlaw. Ia kawei la kem na West Karbi Anglong bad ia uwei pat na Shillong. Ka kynhun jong ngi kala kurup ia ki snieh kyrbei na kine ki briew. Ka jingtohkit mynta kala iaid shakhmat halor ka jingdonkti ha ki kam khaii tuh ia ki snieh mrad khlaw shabar ka Ri”.
Ha ka 29 tarik Jylliew, 2023, ki Pulit ka Azara Police Station kila ioh kem ia 4 ngut ki briew bad ioh kurup ia ki snieh khla bad ki shyieng. Ia kine ki briew bad kine ki mar la aiti noh sha ka Tnad Forest.
Ki Pulit ki iathuh ba kane ka jingkhaii tuh ia ki snieh mrad khlaw ka dei kaba jur bha bad ia kine ki snieh khla la shem ba la siat ia ki khlaw ha Gadchiroli, Maharashtra bad la wan kit sha Meghalaya ban pynpoi sha shiliang u pud ka Ri India.
