Shillong, Rymphang 27 : Ki Pulit ka Cachar kila ioh ban kem ia 4 ngut ki runar kiba kam ialade ba ki dei ki lehnoh ka ri Pakistan ban dawa pisa na ki kompani ba shna ia ka surok 4-Lane.
Arngut na kine ki runar la ioh ban kem na East Jaintia Hills, Meghalaya da ka jingiarap ki Pulit ka Meghalaya.
Haba kren sha ki lad pathai khubor, u Superintendent of Police ka Cachar Numal Mahatta ula ong ba arngut na kine ki runar ki dei ki nongshongshnong ka Kachudaram katba arngut ki dei na ka thain Katigorah.
U Mahatta ula iathuh ba ha ka 21 tarik Rymphang, ki Pulit kila ioh pdiang ia ka jingujor na ka kompani Jhandu InfratechLtd, kaba pyntrei ia ka surok Highway ha Cachar District bad mar mar ki Pulit kila pynlong ia ka jingtohkit bad ka jingkhynra.
“Ka nongujor ka pyntip ba uwei u briew bym lah ban ithuh, uba pynithuh ialade kum u dei u dkhot ka Laskar-e-Taiba (LeT), ula phone ia u nongtrei ka kompani bad dawa pisa haduh T.10 klur na ka kompani haba byrngem ruh ban leh tyngeh lada ia ka pisa ym lah ban siew hapoh ka por ba kila buh” ong u SP.
Ki Pulit ka Cachar kila register mar mar ia ka case ha Katogorah Police Station bad ha ka jingtohkit, kila lapdien ia kine ki 4 ngut kiba donkti ha kane ka kam bad hadien la pynlong ia ka jingkhynra kaba jur ban iohkem ia ki.
Kine ki briew ba shah kem ki kyrteng u Boktar Hussain (u nongialam), u Sansir Uddin Barbhuiya, Md Alekuddin bad u Ajiruddin ba khot sin u Amiruddin.
