Shillong, K’lyngkot 06 : Ki shipai BSF ka Meghalaya Frontier kila ioh ban pynpulom ia ka kam khaii tuh ia ki mar sha Bangladesh na Khappud ka West Jaintia Hills bad ioh kem ia uwei u nongkhaii nalor ka jingkurup ia bun bah ki mar.
Ki shipai BSF kila pynlong ia ka jingkhynra hynnin ka sngi U Blei ha ka thain Nongkhen BOP kaba don hapoh ka thain Riyazlong, WJH bad ioh kem ia uwei u briew na kawei ka kali Alto.
Ki shipai ki iathuh ba kane ka kali ka kit ia ki mar kynthup ia u rynsun, ka shini, blanket, ki blade khrut tmain, bad kiwei kiwei.
Ia une u briew bad ia ki mar bala ioh kurup la aiti noh sha ki Pulit bad ki Custom ba kin leh ia kaba donkam.
