Shillong Nailur 24: Ki shipai BSF kila iohkem ia uwei u nong Bangladesh katba u dang thmu ban rung tuh lyngba ka thain khappud kaba don ha South West Khasi Hills District.
Ki shipai jong ka 1st Battalion BSF kila pynlong ia ka jingkhynra hajan ka BOP Kanai ha ka sngi Nyngkong, hadien ba kila ioh ia ki jingtip kiba paka bad kumta kila ioh kem ia u nong Bangladesh uba la tip kyrteng u Tonik Hajong, 38 snem ka rta uba na ka Netrakona district jongka ri Bangladesh bad na ka met jongu, la ioh kurup ia ka pisa Bangladesh 2,37,500 Taka ban pyndonkam ha ki kam khaii tuh ha ka khappud.
Ha kawei pat ka jingkhynra, ka 4th Battalion BSF kala ioh kurup ia ki mar bad ki tiar pynbhabriew kiba shongdor T.15 lak katba ka kynhun ki riewsniew kiba don 4-5 ngut kila ioh ban phet krad noh shapoh khlaw.
Ki BSF kila leit ban aiti noh ia utei u nong Bangladesh uba la shah kem sha ki pulit ba kin leh ia kaba donkam katba ia ki tiar pynbhabriew kiba la ioh kurup kila leit ban la aiti noh sha ka tnad Custom ba kan leh ia kaba donkam.
