Shillong, Iaiong 24: Ki shipai iada khappud Border Security Force (BSF) Meghalaya tang hapoh 4 bnai jong u snem 2025, kila ioh kem haduh 78 ngut ki nong Bangladesh bad 37 ngut ki nong India kiba donkti haki kam khaii tuh ha khappud ka Jylla bad Bangladesh.
Nalor kane, ki BSF kila ioh kem ruh iaki 6 ngut ki nong India ba donkti ban iarap pyn prong tuh iaki nong Bangladesh sha u pud u sam ka Meghalaya.
Ha kine ki 4 bnai ki BSF Meghalaya kila ioh ruh ban kurup bun jait ki mar kum u Ganja, kyiad, ki jingtah pynbhabriew, ki jain bad kiwei kiwei bad 750 ki masi ba shongdor ym duna T.11.70 klur. Kine ki mar ki dei ki ba thmu shalan tuh sha Bangladesh.
Ki BSF kila shimkhia bha ban iada ia u pud u sam ka Jylla la ka dei naka jingwan rung beain ki briew ne ban tehlakam iaki kam khaii tuh haki thain khappud.
La iathuh ba ki BSF Meghalaya naka por shaka por ki pynlong ruh ka jingiakynduh lang bad ka Border Guards Bangladesh (BGB) Bangladesh ban iathir halor ki sienjam ban shim ban iada iala u pud u sam bad ban tehlakam iaki kam beain haki thain khappud.
“Hadien ka jingtohkit la lap ksai iaki lynti lane ka jingiadon bynta ki trai Ri ban iarap iaki nong Bangladesh ban rung shapoh ka Jylla bad sha kiwei ki Jylla ka Ri bad ia kine ki jingtip la iasam bad ki bor Sorkar Jylla ban leh katkum ka jingdonkam ban pynthikna ba kan nym don shuh ka jingwan rung beain ki briew shapoh ka Jylla” la ong ka kywroh naki BSF.
Nalor ki kam ban iada ia u pud u sam, ki BSF kila pynlong ruh bun tylli ki prokram ban pyniajan hapdeng ki shipai bad ki nong shong shnong haki thain khappud jong ka Meghalaya.
Haki 4 bnai jong 2025, ki BSF kila pynlong man ka por ki jingia jingsumar ei iaki paidbah, kila pynlong 13 sien ka blood donation camp bad 22 sien ki Civic Action Programs nalor ka jingsam tiar ba donkam iaki nong shong shnong.
 Meghalaya tang hapoh 4 bnai jong u snem 2025, kila ioh kem haduh 78 ngut ki nong Bangladesh bad 37 ngut ki nong India kiba donkti haki kam khaii tuh ha khappud ka Jylla bad Bangladesh.){kind=link}