Shillong, Risaw 03 : Ki shipai Border Security Force (BSF) kila ioh kem ia 5 ngut ki nong Bangladesh kiba wan na Chennai, Tamil Nadu, da ka jingthmu ban jam sha shiliang u pud ka Bangladesh.
Ia kine ki nong Bangladesh la ioh ban bat na ka thain Dalu ha ka sngi Balang.
Ki shipai BSF ki pyntip ba ki shipai iaid pahara kila iohi ia kine ki nong Bangladesh ka kawei ka Auto Rickshaw kaba pynieng kham pajih na ka jaka ba ieng ka kynhun shipai. La ong, ba kine ki briew mar mar kila mih na ka kali bad thmu ban phet krad hynrei ki BSF kila kthong bad kila ioh ban kem ia ki baroh.
Ha ka jingtohkit la lap ba kine ki nong Bangladesh ki dei kiba wan na Chennai bad ki dei kiba trei ha kawei ka karkhana pynmih jain ha Chennai. La ong ba kine ki briew ki don jingthmu ban jam sha Bangladesh.
Ki shipai kila aiti noh ia kine ki briew sha ki Pulit ka Dalu Police Station ba kin leh ia kaba donkam.
