Shillong, Jymmang 09: Ki shipai Border Security Force (BSF) kila kem ia lai ngut ki jawan (shipai) kiba donkti ban ther kuli ia ka trok kaba lam sha ka jingiap jong u Bah Roning Nongkynrih ha Mawshun, kaba hap hapoh ka Pynursla Sub Division.
Ia kine ki shipai la kem hynnin ka sngi Nyngkong bad ka jingtohkit mynta kala iaid shakhmat.
Ki shipai BSF kila pynmih ia ka hukum ban pynlong da ka Court of Inquiry halor kane ka jingjia.
Kine ki lai ngut ki BSF ki kyrteng u head constable Moni Singh, u Constable Sengel Singh bad u Constable Kdam Kishore. Kine ki lai ngut ki dei kiba don ha ka sngi kaba jia ka jingther kuli.
Ha kajuh ka por, ki BSF kila sospon ia u Moni Singh uba siat haduh 3 kuli na ka suloi SMG Barreta bad lah phah ia u sha BSF Headquarter ryngkat ka hukum ba um dei ban mih khlem da ioh jingbit.
Ka dei ha ka miet sngi thohdieng ba ki shipai BSF kila siat iap ia u Bah Roning uba don arngut ki Khun ha Mawshun, halor ka jingsuba ba u dei u nongkhaii beain ia ki masi.
U Bah Roning ula iap na ka jingshei kuli na ki bynta jong ka khlieh bad ka ryndang.
Halor kane ka jingjia, ka KSU hynnin ka sngi Nyngkong kala pynlong ia ka rally ba jai jai ha Pynursla ban pynbor ia ki BSF bad ka Sorkar Jylla ban kem bad pynshitom ia ki BSF kiba donkti.
Hynnin ka miet, ka kynhun ki runar kila hiar thma ia ka ktem ki shipai BSF ha Lyngkhat bad kila wiang ding ia kane ka ktem.
