Shillong, Nohprah 23: Ha ka jingkhynra iaki kam khaii bein, ki shipai Border Security Force (BSF) ki la kem ïa 13 ngut ki nong Bangladesh kiba donkti ha ki kam khaii tuh.
Ki shipai jong ka 4th Battalion ka BSF Meghalaya Frontier ki la ioh ruh ban kurup haduh 35 byrni ka shini ryngkat bad kiwei pat ki mar ba thmu khaii tuh kynthup ia ka kyiad, sla sha, ka sainar rnong, ki sikret, jingtah pynbhabriew, ki blanket, ryngsun bad kiwei kiwei.
Ka dor jong ki tiar ba la ioh kurup daki BSF ka long T.10.50 lak.
Hadien ba la pyndep ia ki jingdonkam bad ka eksamin ha PHC Dawki, ki BSF ki la aiti noh ia kitei ki briew kiba la shah kem sha Dawki Police Station, West Jaintia Hills District, na ka bynta ban leh ia kaba donkam katkum ka ain.
Ia kane ka jingkhynra la pynlong ha ki jaka bapher bapher jong ka East Khasi Hills, East Jaintia Hills, bad South Garo Hills District.
Ha ka kyrwoh, ka tnat shipai BSF ka la pynpaw ba ka dang ïai bteng ha ka jingkular jong ka ban ïada ïa ki khappud jong ka ri India bad ka dang ïai bteng ban ïakhun pyrshah ïa ki kam be-aiñ kiba ïaid lait ïa ki khappud, kynthup ïa ka jingwan rung tuh bad ka jingkhaii tuh.
