Shillong, Nailar 17 : Ka thma pyrshah ia u droks ha Meghalaya kala ioh kheit ia u soh ha ka Sngi U Blei, da ka jingiohkem ka Anti Narcotics Task Force (ANTF) bad ki Pulit ka East Jaintia Hills ia ki 4 ngut snar khaii droks na ki artylli ki jingjia tang ha ka shisngi bad kurup ia u droks ba shongdor palat T. 4.4 klur.
Ha ka jingkhynra ba nyngkong, ki Pulit bad ka ANTF kila pynap shrip ha ka shnong Byndihati kaba hap hapoh ka Khliehriat Police Station, ha kaba kila bat ia kawei ka bos kamai bad kem ia uwei u briew ba kyrteng u Isak L Joute (26) ba na Madanrting, Shillong.
Na ka met une u briew la ioh ban kurup haduh 91.86 gram u heroin bala song ha ki khyndai tylli ki synduk sabon, uba shongdor kumba T.40 lak.
Ha kane ka juh ka sngi, kane ka kynhun kala pynieng biang ia ka jaka talasi ha Umkiang Petrol Post kaba hap hapoh ka Lumshnong Police Station bad ioh kem ia lain gut ki kynthei kiba khaii droks.
Kine ki laingut ki kyrteng ka Kimnei (33), Dimkhothing (47) bad Ngaiting (40) kiba dei ki nongshongshnong ka Khongjom, Tengnoupal, Manipur. Ha ka jingtalasi ia ka kali jong ki, ka kynhun kala ioh kurup haduh 961.33 gram u heroin bala song ha ki 80 tylli ki synduk sabon uba shongdor haduh T. 4 klur. Ia une u droks la buhrieh ha ki saw tylli ki pla leit jingleit.
Ki Pulit ki iathuh ba kine ki briew ki dei shibynta jong ka kynhun khaii droks na kawei ka jylla sha kawei pat bad ki dei kiba wan kit ia u droks na Manipur sha Shillong bad sha kiwei pat ki jaka hapoh ka Ri India.
Ia baroh artylli ki jingjia la register case hapoh ka NDPS Act bad ka jingtohkit mynta kala iaid shakhmat ban ioh kyndang ia ki briew kiba donkti baroh.
 bad ki Pulit ka East Jaintia Hills ia ki 4 ngut snar khaii droks na ki artylli ki jingjia tang ha ka shisngi bad kurup ia u droks ba shongdor palat T. 4.4 klur.){kind=link}