Nongpoh, Naitung 08: Ha kawei ka jingjia, kawei ka trok kit nar rot ka la kem ding kynsan kynsan bad ki thylliej ding ki la bam duh ia ka jaka shong u nongniah hynrei donbok ha kane ka jingjia ym shem la don kano kano ka jingjia kaba sngewsih.
Kane ka jingjia ka la jia hynne ka step sngi Thohdieng, ha ka por 9 baje eiei ha surok Shillong Bypass, Ri Bhoi District.
La ioh jingtip ba katei ka trok kit nar rot ba don u number WB 57 1028, ka dei kaba pynieng ha katei ka jaka naduh ka 5 tarik u Naitung namar ka jingthut jong ka kali, bad u nongniah jong kane ka kali u la buh ia ka tin diesel hapoh katei ka kali.
Hynrei mynta ka sngi katba u nongniah bad u nongbud ki dang leit thied jingthied, kane ka kali ka la kem ding kynsan hynrei la lah ban pynlip noh ia ka ding da ka jingpoi kloi ki bor pulit pynlip ding napoh Umiam Fire and Emergency Service.
Pule ruh: Pyrshah jur ka KSU ba thmu wanrah lynti rel ka Sorkar sha Khliehriat
