Shillong, Risaw 19: U myntri ka tnat PHE u bah Renikton Lyngdoh Tongkhar ula ong ba ka jingkyrduh kam um dei satia tang hapoh ka thain Laitumkhrah, Mawprem ne Nongthymmai hynrei ki paidbah ka nongbah Shillong baroh kawei ki ju mad iaka jingkyrduh um ha kine ki bnai ba mynta.
Haba kren sha ki lad pathai khubor u bah Renikton ula iathuh ba na ka liang u Chief Secretary (CS) ula lum ka jingialang hapdeng ka tnat Municipal bad ka PHE naka bynta ban iathir haba iadei bad ka jingkyrduh ha baroh kawei ka nongbah Shillong.
U bah Renikton ula iathuh ba kane ka jingkyrduh um khamtam hapoh ka thain Laitumkhrah, Mawprem bad Nongthymmai kadei namar ka jingthut ka bording haka por pump iaka um bad kumjuh ruh ka jingpei ki pipe um naduh ki jaki jaka pyllang um haduh ki tyllong ïng ha ki bynta ka nongbah Shillong.
“Ki don shibun ki daw kiba pynlong iaka jingkyrduh um ha kyllang ka nongbah Shillong kiba kynthup ka jingthut ka bording, ki pump lane ka jingduh noh ki pipe um ha ki bynta ka nongbah bad kiwei kiwei de bad dei namar kane, u CS ula lum iaka tnat Municipal bad PHE ban pynbeit ia kine ki jingeh baroh” la ong u bah Renikton.
U bah Renikton ula iathuh ba katkum ka jinglong jingman ka mariang, ka nongbah Shillong kam dei ban kyrduh um ha kum kane ka por namar ki tyllong um ruh ki dang pahuh ka um hynrei namar ki daw ba bun kala pynlong iaki longïng ban duh um wat kum ha kane ka por.
Ula iathuh ba haka 20 tarik mynta u bnai un sa lum biang ka jingialang hapdeng ka tnat PHE bad Municipal ban iakren kumno ban pynbit pynbiang iaki jingdonkam ban pynpoi um bam sha ki tyllong ïng la kadei ban pynbeit iaka jingdonkam bording ha ki jaka tan um ne ban pynbha iaki pipe um ha ki bynta ka nongbah.
“Ka jingthut ka bording haka por Pump um kadei ka daw bah kaba pynsniew iaki kor tan um bad dei namar kane ka tnat kan sa iakren sani bha bad ka tnat bording bad Municipal ban pynthikna ba ka bording kadei ban biang bha khamtam ha ki jaka tan um” la ban biang u bah Renikton.
Lah ban kdew ba haka 13 tarik mynta u bnai ka MLA ka East Shillong ka kong Ampareen Lyngdoh bad u MLA ka West Shillong u bah Mohendro Rapsang kila kynduh ia u Chief Secretary (CS) ka jylla bah D.P Wahlang ban iakren halor ka jingkyrduh um hapoh ka thain Laitumkhrah, Nongthymmai bad Mawprem.
