Shillong, Rymphang 01 : Ka Iingkashari Supreme Court kala kdar noh sharud ia ka hukum set along shirta jingim bala pynmih da ka Iingkashari Meghalaya High Court pyrshah ia u Bernard Lyngdoh Phawa bad Boni Lyngdoh Phawa haba iadei bad ka jingshah pynuap u samla pule ha Shillong ha u snem 2006, haba pynneh ia ka hukum ban pynlait noh ia ki kat kum ka rai ka IIngkashari ba bishar ia kane ka kam.
Kane ka mukotduma ka dei halor ka jingiap u Biplab Das, u samla pule mass communication ka St.Anthony’s College, uba la jah rngai ha ka 18 tarik Rymphang 2006.
Ia ka metiap u Biplab lah lap hadien laisngi na ka lum jingtei kaba don ha Mawlai Mawroh.
Ia kane ka met la tep ha kane ka lum jingtep bad ki Pulit kila leit ban khlong noh hadien.
Ki prosecution kila kynnoh ba u Das ula shah rahbor bad shah pyniap hala ki jong ki paralok kiba dawa pisa bad uwei na kine kiba shah kynnoh, ula ialam ia ki Pulit sha ka jaka ba tep ia ka met.
Katba ka Iingkashari ba tian bishar kala pynlait ia kine ki nongshah kynnoh, namar ka jingbym biang ki sakhi satar, ka Iingkashari Meghalaya High Court kala pynkylla ia kne ka hukum bad pynngat ia ki hapoh ki kyndon ba iadei bad ka jingpyniap briew bad ka jingpynjulor ia ki sakhi satar.
Haba pdiang ia ka jingkyrpad, ka Iingkashari Supreme Court kala pynpaw ba ki prosecution kim shym la lah ban pynskhem ia ki jingpynshisha ba pura.
Ka Iingkashari kala kdew ia shibun ki jingduna ha ka jingtohkit kynthup ka jingartatien halor ka khana “ba iohi ba ki iadon lang’, ka jingioh kurup ia ka tiar ba pyniap, bad ka jinglah ban shaniah ia ka jingshim jingthoh ia kaei kaba phla. Kala pynpaw ruh ba ki sakhi ha ka liang ka medical ruh kam pat long satia kaba biang pura.
Ka Supreme Court ka iai ban ba ka rai ban pynlait ia ki ka pynskhem ia ka jingsngew ba long lui lui bad ym dei ban shu pynkylla syndet ia ka. Ka hukum ba dei ban pynlait noh mardor ia kine kiba shah kynnoh lada ki dang don hapoh along bad pynduh noh ia ki bail bond jong ka lada la dep ban pynlait ia ki.
