Shillong, K’lyngkot 15 : U Myntri Rangbah ka Jylla Conrad K Sangma ula pynba ba ki kam ki jam ban thaw ia ka One North East Front kila iaid shakhmat, da ka jingiaid shakhmat ki jingiakren bad ki nongialam jong ki seng sain pyrthei bapher bapher kiba dei na ka thain Shatei Lam Mihngi.
“Kumta, ngi dang ia syllok bad iakren ia bun na ki nongialam jong ngi….kiba bun ki briew kila shim ba ka dei ka lynti kaba biang bha” ong u Conrad haba iakren bad ki nongthoh khubor ha ka sngi Palei.
U Conrad ula ban jur ba ka thong ka long kaba thrang dikdik bad kaba bun ki jingeh, hynrei ka party kala trei shitom ban pynurlong ia ka.
“Ka dei kaei kaei kaba ngi kwah har har….bun ki seng sain pyrthei kila pyrshang ban pyniaid shakhmat ha kane ka bynta bad kam dei ka kam kaba suk” ula bynrap.
Haba kylli ia ka jingbuhpor, u Conrad ula ong “Kam long kum ka jingbuh mawnongrim na ka bynta kano kano ka project..ka dei ka jingiakren hapdeng ki seng sain pyrthei bapher bapher ba kin iawanlang, kan shimpor, kam dei satia kaba suk”.
Une u Khliehduh ka NPP ula kiar ban sam shuh shuh ia ki jingtip ba kham bniah da kaba ong ba kane ka kam hi ka dang kaba dang sahteng ban pynbna.
“Shibun ki jingiakren kila jia, hynrei kam long kaba iahap ia nga ban ai ia ki jingtip sha phi ia mynta namar ngim pat pynbna paidbah satia ia ki” ula ong.
