Shillong, Nohprah 30: U President ka Khasi Student Union (KSU) u Samla Lambokstarwell Marngar ula ban jur ba ki District Council ha rilum Khasi-Jaintia kim dei ban ai No Objection Certificate (NOC) ia ka Northeast Frontier Railway (NFR) ne iaka Sorkar Pdeng ban wanrah lynti Rel hapoh Meghalaya.
“Kam pher ka Sorkar Pdeng bad ka NFR kan iai tynruh ia ka Sorkar Meghalaya khnang ba kan kohnguh ban pynpoi lynti Rel hynrei kum ka seng, ngim ailad satia katba ngim pat don iaki ain kanun ban iada iaka Jylla naka jingwan buhai shnong ki bar Jylla” la ong u President ka KSU.
Ula banjur ruh ba baroh ki nongthaw aiñ hapoh ka ïingdorbar bad ha ki District Council ba kidei ban khohreh ban thaw Policy ban kyntiew iaka pule puthi bad iaka ioh kam ioh jam ki samla, ym ban khohreh ia kren lynti rel.
“Ngi don ki District Council bad ngi kyrmen ba kim dei satia ban ai NOC. Kumjuh ka Sorkar Jylla kam dei ban khohreh iakren lynti Rel hynrei lada ki iaid shakhmat ka mut ki donkti ban bynda iaka Jylla bad iaka jaidbynriew” la ong u samla Lambokstarwell Marngar.
Ula ong ba ka KSU kan iai buddien halor ka jingdonkam ia ka Inner Line Permit (ILP) bad kan iai dawa ruh na ka Sorkar Jylla ban pyntreikam noh iaka MRSSA 2016 ban tehlakam iaka jingwan buhai shnong ki bar Jylla hapoh Meghalaya bad ula dawa ruh naka Sorkar Jylla ban mynjur biang sa kawei ka Resolution halor ka ILP hapoh ka ïingdorbar thawaiñ ban pynbor ia ka Sorkar India ban ai jingmynjur noh ia ka ILP ban pyntreikam ha ka jylla Meghalaya baroh kawei.
“Khlem ki ain ba khlain kum ka ILP, ka KSU da lei lei ruh kam pdiang ia ka lynti Rel bad lada ka Sorkar Jylla ne ki District Council ki ia sylla lang ban wanrah lynti Rel ha Meghalaya, kin sngewthuh kaei ka ban jia hapoh ka Jylla” la pynkut u President ka KSU.
 u Samla Lambokstarwell Marngar ula ban jur ba ki District Council ha rilum Khasi-Jaintia kim dei ban ai No Objection Certificate (NOC) ia ka Northeast Frontier Railway (NFR) ne iaka Sorkar Pdeng ban wanrah lynti Rel hapoh Meghalaya.){kind=link}