Shillong, Nailar 10 : U MLA ka Congress bad Chief Whip ka Liang Pyrshah Saleng A Sangma ula ong “Lada ki Nongtrei Sorkar kim shimkhia satia ia ka kam bala bynshet ha ki, ngin ym lah satia ban tehlakam ia ka jingrung kyrthep ki bar jylla wat lada pyntreikam ia ka Inner Line Permit (ILP).
Une u Nongialam ka Congress ula kren ia kane haba kdew ia ka jingkhein sting jong ki Pulit ka Tnad Infiltration kiba don duty ha ‘Entry and Exit Point’ ha Byrnihat, Ri-Bhoi.
Haba iakren bad ki nongthoh khubor ha ka sngi Palei, u Saleng ula ong ba ki briew ba don ha duty ha ‘Entry bad Exit Point’ ha Byrnihat, Ri-Bhoi kim shimkhia satia ia ka kam ban khmih bniah ia ka rung ka mih ki bar jylla.
“Ngi la iohi ha Byrnihat ba ka don ha Entry bad Exit Point hynrei haba phi wan ha ka por 8:30 haduh 9 baje mynmiet, phin nym iohi shuh ia ka jingkhmih ia ki briew ba wan rung sha Jylla. Kine ki briew kim shimkhia satia ia ka kam. Ta ka daw ka jingrung kyrthep ki bar jylla kala jia bad wat lada treikam ka ILP ruh, kan iai long hi kumjuh” ula ong.
U Saleng ula ther tyngeh ia kine ki Nongtrei Sorkar kiba dei ban talasi ia ki kot ki sla ki briew ba wan rung sha Jylla bad ong ba ki dei ban shimkhia noh iala ka jong ka kam.
“Lada ka Tnad, ki bor treikam hi kim long discipline kumno ngin khmih lynti ban pynsangeh ia ka jingrung kyrthep ki briew ba nabar ka Jylla” ula bynrap.
Haba kdew ia ka jingnang bun ki nongshong dukan madan ba beain ha kylleng ki jaka ka Nongbah Shillong, u Saleng ula ong ba kine ki briew kim pat don ha ki 4-5 snem bala leit noh hynrei mynta kila die ia ki mar ki mata ha kylleng ki jaka jong ka Nongbah.
“Ki Dorbar Shnong ruh kin hap ban shimkhia bha ia kane, ki dei ban talasi man ka por ban tip mano kita ki briew kiba wan rung hapoh ka thain. Ka jingrung beain ki briew kan iai teng lada ngi hi kum ki nongshongshong ngim shimkhia satia” ula ong.
Une u Chief Whip ka Liang Pyrshah ula ai jingmut b aka dei ban don ka jingmaham kaba tyngeh na ka liang jong ka Sorkar ban pynlong ia ki bor ba dei pyrrkhing ia ka jingrung ki bar jylla ba kin pyndep hok iala ka kamram.
