Shillong, Nohprah 01 : U Nongaiktien ka BJP Bah M Kharkrang hynne ka sngi Thohdieng ula ong ba kan sngewtynnad palat lada u MLA bala hynriew sien ka Pynthorumkhrah bad Myntri Sorkar Bah Alexander Laloo Hek, un dei u kyrtong ka Party ban iakhun ia ka elekshon MP-Lok Sabha na Shillong Parliamentary constituency.
Haba iakren bad ki nongthoh khubor, u Bah Kharkrang ula ong “Lada ngi lah ban ioh ia u Bah AL Hek, uba dei u MLA haduh hynriew samoi kynthoh, kan sngewtynnad palat”.
Une u Pulit IPS bala shongthait ula ong ba ki Nongialam ka Partu na Delhi kim pat shym la pan ia kano kano ka jingtyrwa haba iadei bad kane ka kam. “Namar kata, kam pat don ka kyrteng jongno jongno ruh kala poi sha Delhi” ula bynrap.
U Bah Hek dang shen haba jubab ia ka jingkylli ula ong “Ka shong ha ki nongialam ka party ha Delhi ban shimrai mano ban mih iakhun ia ka elekshon.” Ula pynpaw ruh ba ki don lai ngut ki kyrtong kiba kwah ia ka ticket na Shillong.
Haba kylli, u Bah Kharkrang ula ong “Kam dei satia kaei kaei kaba sngewkmen ban pynieng kyrtong, kaba donkam hi ka long ba ngin hap peit la ngi don ne em u kyrtong uba biang”.
“Ngin jin da sngewtynnad eh ban ioh da ka kyrtong kynthei. Ngim pat khang ia ka jingkhang jong ngi, ngi dang plie ia baroh” ula ong.
Ha kajuh ka por, une u nongaiktien ka BJP ula ong ba ka Party kam don jingkwah satia ban iatreilang bad kino kino ki seng sain pyrthei hashuwa ka elekshon Lok Sabha. Kat kum ka jingong jong u, ka BJP ka ju iakhun ia ka elekshon dalade marwei.
