Shillong, Naitung 04 : U Khlieh nongialam ka kynhun na Bangladesh uba dei ruh u Addl Director General, Region Commander, Chottagram Md Shazedur Rahman ha ka sngi Palei, ula kam ba ka jingleit rung tuh ki nong Bangladsh sha kiwei pat ki ri ba marjan kala nang duna.
“Ngim shym la iohi ia kano kano ka khubor ba kan nang kiew. Ha Bangladesh ka ioh ka kot kala nang kiew kumta ka jingleit rung tuh sha kiwei pat ki ri kala nang hiar” ong u Rahman haba iakren bad ki nongthoh khubor hadien ka jingialang Border Co-ordination Conference bad ki IG ka BSF ba kut hynne ka sngi Palei.
Dang ha ka sngi U Blei, ki shipai BSF kila ioh bat ia 3 ngut ki nong Bangladesh ba kyrteng u Mohibur Rehman (30), Kudus Miah (25), bad Mubarak Hossain na khappud ka East Khasi Hills district.
Ha ka jingkylli jong ngi, kine ki nong Bangladesh kila kam ba kila rung beain sha khappud ka India da ka jingthmu ban leit wad kam sha Jammu & Kashmir.
U Rahman ula kam ba um don jingtip satia ia kum kane ka jingjia.
Hynrei u IG ka BSF Meghalaya Frontier HS Dhillon ula ong ba ki BSF kila kem ia bun ngut ki nong India ba iarap bad pynngat ia ki ha ki kyndon bapher bapher bad dei namar kane, kala nang hiar ka jingwan rung ki nong Bangladesh sha India.
