Shillong, Lber 27 : U Nongialam ka BJP bah AL Hek ha ka sngi Thohdieng ula kam ba katto katne ngut ki sitting MLA ne MLA ba mynta bad ki MLA barim ki lah ban wan pyniasoh shen sha ka party, watla um shym la ai kyrteng ne ka por.
“Ka dang don ha ka jingiakren bad ha kano kano ka por kin sa wan ynda kila khreh” ong u Bah Hek haba iakren bad ki nongthoh khubor.
“Ki don bun ki MLA ba mynta bad ki MLA barim kiba kwah ban iasoh bad ka BJP, bad nga kyrmen ba shen kan sa jia kane” ula ong.
U Bah Hek ula ai ka jingiaroh ia kane sha u Nongialam bad Myntri Rangbah Duh ka Ri Narendra Modi bad ong ba ka BJP kala treikam bha bad ki paidbah ki dang don ia ka jingngeit bad ka jingshaniah ha ka.
Haba kylli halor ka jingiasoh ki MLA ba mynta bad ka jingpan ticket na ka NPP, u Bah Hek ula ong ba ka BJP kan iai bteng ban tei iala ka party hala ka jong ka lynti.
“Tang namar ki MLA barim ne MLA ba mynta ki iasoh sha ka party kam mut pat ba kin shu jop beit” ula ong haba bynrap “Donkam bha ia ka jingkhein jingdiah ha ka sain pyrthei. Ka kam sain pyrthei kam dei kaba suk”.
