Shillong, Naiwieng 18 : U President ka Bharatiya Janata Party (BJP)-Meghalaya Pradesh, Bah Ernest Mawrie ula kam ba lai ngut ki MLA ba mynta kin sa wan pyniasoh noh sha ka BJP ha u bnai ban wan ha New Delhi.
“Ngi don lai ngut ki MLA ki ban sa wan pyniasoh noh bad ngi ha New Delhi ha ka taiew ba nyngkong jong u Kyllalyngkot” ong u Bah Ernest haba iakren bad ki nongthoh khubor hynrei ula kyntait pat ban iathuh ia ka kyrteng namar ka lah ban khring ia ka Anti-Defection Act jong ka Tenth Schedule ka Riti Synshar ka Ri.
Ka tyllong khubor ka iathuh ba lai ngut ki MLA jong ka National People’s party (NPP) ki lah ban mih noh na ka NPP shen. Kine ki kynthup ia u MLA ka Phulbari SG Estamur Mominin, ka MLA ka Selsella Ferlin CA Sangma ki lah ban rung sha ka BJP bad u MLA ka Raksamgre Benedic Marak u lah ban iasoh sha ka AITC.
Nalor u Marak, u MLA ka AITC na Mawsynram Bah Himalaya M Shangpliang ula pynpaw ia ka jingkwah ban pyniasoh noh sha ka BJP hashuwa ka elekshon MLA 2023.
Hynrei u Bah Ernest ula kyntait ba kane ka khubor ka long kaba shisha bad ong “Hooid, katto katne ki dei na ka NPP bad ruh na ka AITC bad na kiwei ki party ruh kumjuh hynrei ka dang kloi palat ban iathuh ba katno ngut kin dei na ka NPP”.
Une u Nongialam ka BJP ula pyntip ruh ba ka Party kala nang iakren ruh bad arngut kiwei pat ki MLA ba mynta.
“Kine ruh ki kwah ban wan iasoh noh bad ka BJP namar ka jingtreikam bha jong ka Sorkar BJP ha ka Ri. Khamtem hangne ha ka Thain Shatei Lam Mihngi, phi lah iohi ia ka jingkiew ka roi ka par ha Assam, Manipur bad kiwei ki Jylla ka thain. Namar kata, ka dei ka jingkwah jong ki bad kila dep pyntip sha ngi ba ki kwah ban wan iasoh noh bad ngi” ula bynrap.
