Agartala, Lber 08 : U Myntri Rangbah barim ka Tripura Manik Sarkar ula ong ba kam dei satia ka kam kaba phylla b aka TIPRA Motha Party kala leit iatreilang bad ka Sorkar BJP hadien ba iasoi ia ka soskular lai liang mamla.
U Sarkar ula ong, kumba long ha ki snem bala lah, ha kane ka kynti kane ka seng ki riewlum kaba la iakhun ban ioh ia ka Jylla riewlum Greater Tipraland, kala iaid lait biang ia ki jingdawa ba kongsan, kaba la jah ruh na ka soskular ba iasoi.
Une u Myntri Rangbah barim ula pynpaw ia ka jingsngewkhia halor ka soskular bala iasoi namar ka jingbym kdew ia ki mat kiba kongsan kum ka ‘Greater Tipraland’ lane ka jingpynbeit da ka Riti Synshar ka Ri,laba lam sha ka jingsuba ba don ka jingiapynbeit sopsop aiu re.
Ula ong ba ka TIPRA Motha Party kaba la shu ap ban iohi ia kano kano ka jingmih jong ka soskular, kala leit iasoi khlem pynslem sha ka Sorkar, kaba pyndep ia ka jingiathaw kynhun kaba pynmyntoi ia ka BJP.
U Sarkar ula ong ba kam long shuh kaba lyngngoh b aka Motha kala iasoh bad ka Sorkar namar kane ka party kala don lypa ha ka kynrum kynram bad bun ki nongialam bad ki MLA kila pyrshang ban long Myntri ha kaba bun kila dep iasoh bad ka BJP katba katto katne kila wan iakren bad ka CPIM.
Une u Myntri Rangbah barim ula pynbna ruh ia u Jitendra Chaudhary kumu Nongialam ka Liang Pyrshah ha ka Iingdorbar Thaw Ain hadien ba ka TIPRA Motha kala leit iasoh noh bad ka Sorkar.
