Kam ka MPCC ban wanphai biang ki MLA bad Myntri Sorkar barim sha ka Congress

Shillong, Nailur 20 : U President ka Meghalaya Pradesh Congress Committee (MPCC) Bah Vincent H Pala ha ka sngi Thohdieng, ula kam ba bun ki briew kynthup ki MLA bad Myntri Sorkar barim, kin sa wanphai bad pyniasoh biang sha ka party (Congress) hapoh ka Jylla.

Haba iakren bad ki nongthoh khubor, u Bah Pala ula ong “Kam don satia ka jingkyntait ia ka jingshisha ba ki don bun ki MLA kiba la mih bad kam don ruh ka jingkyntait ba bun na kine ki MLA kila kwah ban wanphai biang kat haduh mynta ka sngi”.

Haba khein kam kai ia kito kiba kynnoh ia u halor ka rai jong ki ban mih noh ia ka Congress, une u MP barim ka Shillong ula ong “12 ngut ki MLA kila mih na ka Congress bad leit iasoh sha ka TMC hynrei iathuh ia nga katno ngut na ki, ki dang sah bad ka TMC bad leit iasoh sha ka UDP, NPP bad kiwei ki party?. Balei kane kan phalang ha nga? Ha ka Congress ha ka por ba ki ieh ki ong namar u Bah Pala hynrei haba ki mih na ka TMC kin ong pat ka dei namar jong no?”.

“Ha kajuh ka por, san ngut kila mih na ka Congress-ki lah ban ong ba dei namar u bah Pala hynrei katto katne na ki, kila leit iasoh sha kiwei ki party kum ka nuksa, uwei u MLA ula leit iasoh haduh 3 tylli ki party ha ka shisnem, te iano ngin kynnoh. Nga sngew ba kam iahap ia ki. Tang kawei ka long ba ka Congress ha ka Liang Pyrshah kan nym lah ban leh eiei na ka bynta ka jingmyntoi shimet jong ngi hynrei ngi don hangne ym ban shakri ia ka myntoi sbimet hynrei ban trei na ka bynta ka bha ka miat u paidbah” ula bynrap.

U Bah Pala u pyntip ba ka Congress kan sa pynlong ia ka jingialang ha South West Khasi Hills ha ka 11-12 tarik u Risaw, ha kaba kin don katto katne ki nongialam ki ban sa wan pyniasoh biang sha ka party.

Ha kawei ka liang, u Joint Secretary ka AICC ba khmih ia ka Meghalaya Adv Matthew Anthony ula pynpaw ia ka jingsngew skhem ba ka Congress kan sa leh bha ha ki elekshon ban wan jong ki lai tylli ki Autonomous District Council (ADC), ka ba lah ban long ha u snem ban wan.