Shillong, Iaiong 23 : Ka Harijan Panchayat Committee (HPC) hynne ka sngi U Blei kala ong ba ki Harijan ki dei ki Nongshongshnong ka Meghalaya da ki spah snem bad kim dei satia ki nongkyntur pud jubor.
Haba kynthoh ia ka jingkren u Symbud Myntri Rangbah Bah Prestone Tynsong halor ka shithi ba ka HPC kala phah sha ki bor khmih halor ka plan bala tyrwa ban pynkynriah ia ki Harijan na Them Metor, u Secretary ka HPC Gurjit Singh ula ong “ La shu jubab mata madei bad nga lyngngoh ba u Symbud Myntri Rangbah ka Jylla ula jied ban kren halor ka jingshisha ha ka rukom ka bym dei”.
“Ngi long beit kiba la khreh ia ka jingiakren kumba ngi la pynpaw ha ki jubab bala dep bad ka dei ka nongrim kaba ngi la kren la bunsien sha ka Sorkar bad sha ka Iingkashari High Court. Ngi la dep kren la bunsien ba ka lynti ban pynbeit ia kane ka jingeh ka dei tang da ka jingiakren bad da ka mynsiem ban ia-ai ia-shim markylliang bad ruh ban ithuh ia ka hok jong iwei pa iwei I nongshongshnong ka thain khlem ka jingpynbor lane ialam bakla” ula bynrap.
U Gurjit ula ong “U Symbud Myntri Rangbah ula ong ba “Ngi la ai ia ki jingtip baroh sha ka Iingkashari High Court”. Nga sngew, ia kine ki jingtip ba bniah la dep ban ai naduh mynshuwa. Ki jingkylli kaba ngi buh bad kaei kaba ka Sorkar ka jubab myntaka long “Balei ba ym ai ia kine ki jingtip naduh mynno?.
Haba pynpaw ba kam iahap satia ia u Nongialam ka Jylla ban ai jingtip ba bakla sha u paidbah lyngba ki lad pathai khubor, une u Nongialam ka HPC ula ong “Ka Blueprint bala ai sha ngi ka dei ka bym pat biang pura. Kam shym don ka jingbuh por, ki iing bala tyrwa ki long kum ki thliew sah ki sim parro, ka jingkylli halor ka hok jong ka jaka ban ai sha ki Longiing ruh kam shym don” haba buh jingkylli “Kumno ngin shu ialehkai matlah bad ka jingim jong ki spah ngut ki longiing, ki rangbah, ki longkmie bad ki Khynnah.”.
“Kala pynkyndit biang ba u Symbud Myntri Rangbah, uba la ithuh teng ba ngim dei kiba shong be-ain, mynta pat ula ong, “Kumno kan lah long ba kin sah hangne la 160 snem?”. Ai ba ngin pynkynmaw ia u Symbud Myntri Rangbah bad ki paidbah ka Jylla Meghalaya ba ngi la don hangne naduh u snem 1863 bad ngi don ia ki kot ki sla ha ka kyrteng bad ka muhor jong u Syiem ka Hima Mylliem” ula ong.
“Ha ka shithi u snem 2008, u Syiem ka Hima Mylliem ula ong “Ia kane ka jaka la aiti la slem bah da u Syiem barim ka Hima tad haduh mynta.” Ha kawei pat ka dulir ba 1954, la kren shai baka jaka ka dei jong ki Nongshongshnong ka Them Metor” ong u Gurjit.
Ula ong, ki don shibun ki khana pateng ba lah ban kdew ba kumno ki Longshuwa jong ngi kila shah ialam hangne da ki shipai Bilat na Gurdaspur bad Amritsar District ka Punjab.
“Ka dei ka jingshisha ba ngi la don hangne la palat 200 snem. Ngi ruh ngi la long ki trai Jylla” ong u Gurjit.
