Shillong, Jylliew 12: Ka Deputy Commissioner (DC) ka East Khasi Hills kong R.M Kurbah kala kam baka jingpyntreikam iaka Odd-Even System iaki kali kamai kala iarap ban pynduna ia ka jingdheng kali ha nongbah Shillong.
Haba kren sha ki lad pathai khubor ka kong Kurbah kala ong ba ia kane ka rai la shim kum shi bynta ban pyntreikam iaka hukum ka Meghalaya High Court, kaba la kdew shai ia ki jingeh ha kine artylli ki jaka kata ka Khyndailad and Motphran.
“Ngam shym la ong ba ka Odd-Even System kan treikam ha baroh kawei ka Nongbah hynrei kan long tang ha kine ki ar jaka kiba khapngiah. Ta ka daw nga la pynmih ia ka hukum bad ngi la ioh ba kala iarap bha (ban pynduna ia ka jingdheng kali)” kala ong.
Ka DC kala iathuh ruh ba ki bor district kin sa sdang ban talasi kali naduh mynta ka taiew ia kiba ialeh pyrshah ia ka rai ban pyntreikam Odd/Even System kaba la treikam naduh 5 tarik mynta u bnai.
“Ngi khlem da pyrkhing than haba iadei bad ka jingpyntreikam iaka hukum namar nga la ioh pdiang iaka shithi ba ki Nongniah kali kamai ba ki kwah ban leit ujor sha ïing kashari halor ka hukum. Nga dang ap ia kano kano ka jingbthah ka ban mih hynrei mynta ka taiew ka bor district kin sdang ban talasi noh ia kiba ialeh pyrshah” la ong ka kong Kurbah.
Haba kylli ka kong Kurbah kala ong “Ngi la iohi ba ka jingdheng kali ha kine ki artylli ki jaka (Motphran bad Police Bazaar) kila duna bha hynrei kan nang iai duna shuh shuh da ka jingpyntrei pyrrkhing ia ka hukum odd-even system. Ngin pyrshang ban pyntreikam pura noh ia ka hukum naduh lashai ka sngi”.
Haba kylli ia ka jingpyntreikam lang ia ka Odd/Even System iaki kali shimet, ka DC kala ong ba katkum ka kaiphod jing tohkit bala pynlong daki bor district, la shem ba ki kali shimet kim dei satia kiba kiba wanrah ia ka jingdheng kali ha kine ki artylli ki jaka.
Ka la ong ba ka kaiphod ka shem ba ki kali kamai ki pyndheng iaka surok hapoh ka thain Khyndailad bad Motphran namar ka jing iaid kyllain hajuh shi hajuh.
“Lada ngi ieh mar shiteng iaki kali naki surok kan wanrah ka jingkylluid bad kan ailad ia kiwei ban leit sha ki jingdonkam bad dei namar kane nga ong ba kim dei ki kali shimet ba pyndheng iaki surok namar ki leit sha ki jingdonkam bad kim ju ieh hajuh kumba leh ki kali kamai” kala ong.
Nalor kane ka DC kala kular ban shimkhia haba iadei bad ka jingrem ka bai kali watla ki kalai kamai ki kit briew kumjuh kumba ju kit hashuwa ka khlam COVID.
 ka East Khasi Hills kong R.M Kurbah kala kam baka jingpyntreikam iaka Odd-Even System iaki kali kamai kala iarap ban pynduna ia ka jingdheng kali ha nongbah Shillong.){kind=link}