Agartala, Lber 03 : Ka State Secretariat Body jong ka Tripura CPI(M) hynnin ka sngi Palei ka la kam ba ka BJP ka la pyndonkam borbah da ka pisa bad lyngba ka sorkar ban ioh ia ka jingjop ha kane ka ilekshon.
Ka CPI(M) ka la ong ruh ba ka jingpynlong ia kane ka ilekshon ka la long kaba iaid suki bad ka la shim por ruh ha kaba iadei bad ka jingpynbna ia ka result.
“Ka result kaba mih na kane ka ilekshon assembly ka pyni ba ka BJP ha ryngkat ka paralok synrop jong ka ki la ioh ia ka jingjop ha kiba bun tylli ki seat da kaba tam tang khyndiat khyndiat.Ka BJP ka la pyndonkam borbah da ka pisa ban pynurlong ia kane. Ia ka sorkar la pyndonkam bakla ha kiba bun rukom.Kata kaba la sdang ruh naduh u Myntri Rangbahduh (PM) ka ri. Ia ka sorkar pdeng ruh la pyndonkam mynta la slem bah,” ong ka CPI(M).
Ha kajuh ka por kane ka party ka la ai ka jingkhublei bad ka jingsngew burom na ka bynta baroh kiba la vote ia ki kyrtong jong ki party bapher bapher kiba iakhun pyrshah ia ka BJP.
“Ha ka jingsynshar donbor jong kawei ka party kaba la leh ia ki kam pyntriem, Nga ai khublei sha baroh ki nongkyrshan bad ki nongai mynsiem na ka bynta ka party CPI(M) kaba la shim ia ka bynta kaba kongsan ha kane ka jingialeh ban pynneh pat ia ka synshar paidbah ia ka suk ka sain bad ia ka jingsynsharj ong ka ain,” ong shuh shuh ka party CPI(M).
Nalor kata ka la ong ruh ba ka jingialeh ban pynneh pat ia ka synshar paidbah bad halor ka hok jong ki briew kumno ba kin bam kin dih bad ban im ka la iaid lyngba kane ka lynti jong ka jingiajied.
“Hynrei ha ki sngi ki ban wan, ka CPI(M) kan iai bteng ban pyrshang ban tei bad pynkhlain ha ka jingialeh jong ki paidbah ban pynioh ia ki hok ki jong ki bad na ka bynta ka bha ka miat jong ka jylla bad ka ri hi baroh kawei,” ong shuh shuh ka party.
Shuh shuh ka CPI(M) ka la kynnoh ruh ba ha ka sngi niew vote, ki katto katne ki nongkyrshan jong ka party synshar ki la leh ia ki kam thombor pyrshah ia ki briew bad ia ki ophis treikam jong ki liang pyrshah bad pyrshang ruh ban pynmih jingiakynad ha ki katto katne ki jaka niew vote ha ka jylla.
