Kam don jingleh bakla lada phah tohkit ia ki jingkynnoh ka HNLC pyrshah ia u DyCM : Paul

Shillong, Jymmang 07 : U Myntri bad Nongaiktien ka Sorkar Bah Paul Lyngdoh ha ka sngi Balang ula pynpaw ba kam don satia kano kano ka jingleh bakla ha kaban phah tohkit ia ka jingkynnoh ba dang shen da ka Hynniewtrep National Liberation Council (HNLC) ba u Symbud Myntri Rangbah ba khmih ia ka Tnad Pynroi Sor Bah Sniawbhalang Dhar ula bei tyngka ia ka kynhun mynba u dang long Myntri ha ka Sorkar barim ba ialam da ka Congress ha Jylla.

Hynrei ula ong pat ba ki Agency kum ka NIA bad kiwei kiwei, kin nym ap satia kat haduh ban da dawa kino kino ki seng sain pyrthei lada ka jingkynnoh ba kum kane ka dei kaba don symboh.

“Ngam iohi ia kano kano ka jingleh bakla ha kane hynrei phi tip ba kine ki jingtohkit ki dei kiba pynshong nongrim ha ki sakhi satar bad ki Agency kin nym pynsyrwa kai ia ka por ban shu tohkit. Lada don ki sakhi kiba biang, kin shimkhia ban tohkit ia ka case la ki don ne ym don kino kino ki seng sain pyrthei kiba kren ia kane ka kam” ong u Bah Paul.

Kane ka jingkynnoh u Myntri kala mih tang shisngi hadien ba ka Voice of the People Party (VPP) kala dawa ban weng noh mardor ia u Bah Sniawbha na ka shuki Symbud Myntri Rangbah ka Jylla kat bym pat dep ban tohkit ia ka jingkynnoh ka HNLC.

Haba kylli, u Bah Paul ula ong “Sngewbha khmih biang ia ka kyrwoh jong ka HNLC. Ka ong ba ka don ia ka jingtip kaba shai shaphang ka jingbei tyngka jong u sha ka Seng mynba u dang long DyCM ha ka Sorkar Congress. Mynta, kum u nongaiktien ka Sorkar MDA-2, ngam don satia ia kino kino ki jingtip ia kaei kaba jia ha ka por jong ka Sorkar Congress. Ngam pat ju don hapoh ka Congress lane ha ka HNLC, kumta ka shong ha phi ban wad na u Bah Sniawbha namar kila iai ong ba u dei u nongsynniang ba bun eh sha ka pla tyngka ka seng mynba u dang don hapoh ka Congress”.

Ula ai jingmut “Lehse u Bah Vincent Pala (President ka MPCC) u lah ban pashai jingshai halor kane ka kam”.