Shillong, Nailur 05 : U Myntri bad Nongaiktien ka Sorkar Bah Paul Lyngdoh ha ka sngi Ba-ar ula ong ba kumba long mynta mynne, ka jinglong jingman ka suk ka sain ha Jylla ka dang long kaba biang.
Haba iakren bad ki nongthoh khubor, u Bah Paul ula ong “Kyllum lang baroh, ngi pat shym la don kano kano ka jingpynthut kaba jur ia ka shongsuk shongsain hynrei khlem pep kin don beit hi ki jingjia ba jia hangne hangtai”.
Ula kyntu ruh ia baroh ki kynhun ban wan sha ka miej iakren ha ka jaka ban rah ia ki jingeh bad jing sngewkhia jong ki sha surok.
“Nga kwah ban kyntu ia baroh ba kin sngew laitluid bad lada phi don ia kano kano ka jingeh ne jingsngewkhia ba phin wan sha ka miej jingiakren ka ban lah ban pynbeit ia shibun kiei kiei ha ka jaka ban rah ia ki sha surok bad pynthut ia ka Nongbah baroh kawei” ong u Bah Paul.
Kane ka jingkynthoh jong u kala mih hadien ki jingkulmar kiba la jia na ka jingiakhih kaba mih pyrshah ia ka jingthmu pynheh ka karkhana dewbilat ha East Jaintia Hills bad ka jingiakhih jong ka HITO ha Shillong.
