Shillong, Iaiong 17: U Myntri Rangbah ka jylla u Conrad K Sangma ula ong, ba ka Space Technology kala leh ia ka bynta kaba khraw ha kaba iadei bad ka jingshim rai jong ka Sorkar Jylla halor ki kam jong ka imlang sahlang bad ka ioh ka kot.
Haba kren haka jingplie pyrda iaka 4th Edition jongka Space Economy Leaders Meeting (SELM) hapoh ka GS Presidency of India kaba la long ha Courtyard Marriot Hotel hynne ka Lah Sngi u Blei, u Conrad Sangma ula ong ba ka sorkar jylla ha ryngkat ka jingiatreilang bad ka NESAC kila lah ban pyndonkam iaka space technology ban ithuh bad ban pynkhreh ia ki polisi ban long kiba pynkhreh ha kaba iadei bad ka jingtehlakam iaka jingshlei um ha ka lynti kaba biang bha.
Ula ong, ka space technology kala iarap ha kaban tehlakam iaka jingshlei um da kaba iaid katkum ka juk stad saian.
U Myntri Rangbah ula ong ba ka space technology kala iarap ia ka sorkar jylla ban ithuh ia baroh ki jaka kiba don ia ki khlaw kiba rben bad kumno ban shim ia ki sienjam ha kaba iadei bad ka jingkylla ka suinbneng bad lyngba ka space technology kala long shisha ka jingmyntoi ha kaban iada ia ki Catchment Areas bad ia ki jingthaw kiba har rukom.
Ula ong, ba ka sorkar kala pyrshang katba lah ban pyndonkam ia ki kor ki bor ban pynthikna ba kan lah ban ai ka jingshakri kaba bha tam ia ki paidbah.
Nalor kane ula ong, ba ia ka jingialang jong ka SELM la pynlong ha kajuh ka por haba ka ri India kala kiew irat ha ka jingiaid shakhmat ha ka liang jong ka space technology bad kadei ruh ha ka por ba ki ri hapoh ka G20 kila bhah tyngka bha ha ki prokram kiba iadei bad ka haw-haw.
Ula ong ba u ngeit skhem ba ka kyrteng jong ka nongbah Shillong kana iai paw ha ki pateng ban dang wan, haba ia kitei ki mawnongrim bad ki polisi kila sdang treikam na Shillong.
U Myntri Rangbah ula ong, katba ka ri ka dang iaid shakhmat, hynrei ka thain shatei lam mihngi kum ka jylla Meghalaya ka bym pat ju sakhi iaka jingkiew irat jong ka ioh ka kot kala lah ban iadonbynta ha ka jingkyntiew pat iaka ioh ka kot bad ka jingjop jong ka ri bad mynta ka thain shatei lam mihngi ruh kala kiew shaphrang.
