Shillong, Jylliew 24: Ka Khasi Students Union (KSU) kala ong ba ka Sorkar Pdeng bad ka Sorkar Jylla kadei ban ai iaka jubab kaba shai kdar ban ong Em ne Hooid halor ka jingdawa pyntreikam iaka Inner Line Permit (ILP) hapoh ka jylla.
Ia katei la ong da u President ka KSU u samla Lambokstarwell Marngar haba ai jingkren hynne ka sngi Saitjain, haka jingpynskhem ia ki nongialam ka KSU Central Executive Council (CEC) kaba la long ha Jaiaw.
U samla Lambokstarwell ula ong, ba ka jinglong jingman jong ka jingdawa ILP ha ka jylla mynta ka long ba ka Sorkar Jylla kala mynjur da ka Resolution hapoh ka ïing dorbar thawaiñ bad kala phah ia katei ka Resolution sha ka Sorkar Pdeng hynrei haduh mynta, ka Sorkar Jylla kam tip, la ka Sorkar Pdeng kan mynjur ne kan kyntait iaka jingdawa pyntreikam iaka ILP hapoh ka jylla Meghalaya.
“Ki nongialam ba synshar ia ka Sorkar Jylla kila pynpaw ba ki iai buddien ia kane ka jingdawa ILP bad ka jingkylli ka mih mynta, sa katno snem ngin iai buddien, sa katno snem ngin iai ap. Ka kyrwoh kaba shai sha ka Sorkar Jylla bad ka Sorkar Pdeng ka long ba dei ban kren shai, Hoid ne EM halor ka ILP khnang ba ki paidbah ka jylla ruh kin sngewthuh kumno ban iaid shakhmat” ong u Lambokstarwell Marngar.
Ula ong, katba ka seng bad ki paidbah ka jylla ki dang ap iaka jubab Hoid ne Em, na ka liang ka seng kan iai buddien ia kane ka jingdawa, la kadei ban ia mih surok ruh, ka seng kam banse ban pynthikna, kaei ka jingpyrkhat jong ka Sorkar Jylla bad Sorkar Pdeng haba iadei bad ka jingdawa ILP hapoh ka jylla.
U President ka KSU ula ong, kumba iohi mynta ka jingrai jong ka sorkar jylla ban mynjur da ka Resolution hapoh ka ïing dorbar thaw aiñ ha ka 19 tarik u Nohprah 2019 iaka ILP kadei tang ka jingtheh umpjah iaka jingkhihwin ki paidbah namar haduh mynta, wat ki bor Sorkar Jylla kim tip shaei ka lawei ka ILP.
“Ka seng ha ki sngi ban wan kan iai bteng iaki prokram ban dawa naka sorkar jylla ban leit tied jingkhang shaduh ka nongbah Delhi ban ioh ka jubab kaba shai halor ka jingdawa pyntreikam ILP hapoh Meghalaya” ong u President ka KSU.
 kala ong ba ka Sorkar Pdeng bad ka Sorkar Jylla kadei ban ai iaka jubab kaba shai kdar ban ong Em ne Hooid halor ka jingdawa pyntreikam iaka Inner Line Permit (ILP) hapoh ka jylla.){kind=link}