Shillong, Naitung 19 : U Myntri Rangbah ka Jylla Conrad K Sangma ha ka sngi Thohdieng, ula ong ba ka Sorkar Pdeng ka khlem ong ‘Em’ hynrei ka dang bishar ia ka jingtyrwa ban pyntreikam ia ka Inner Line Permit (ILP) bad ia ka Meghalaya Residents Safety & Security (Amendment) Bill, 2020.
Kat kum ka jingong jong u, ka jingpyntreikam ia ka ain tynrai Meghalaya Residents Safety and Security Act (MRSSA), 2016, kala iaid kumba ka long.
Haba jubab ia ka jingkylli la ka Sorkar Pdeng ka ong ‘em’ ia ka jingdawa bala slem bha ka Jylla, u Conrad ula ong “Kam long kumta. Ha ka jingshisha wat mynta ruh ha ka por ba nga leit Delhi, nga la iakren ia ka ILP, ka MRSSA bad ka Eight Schedule bad u Myntri kam Pohiing Amit Shah lem bad u Home Secretary. Ngi la iakren ia kine ki kam bad ki khlem ong ‘Em’ hynrei ym pat shym la pynthikna bad ki dang shong bishar ia ka kam”.
U Myntri Rangbah ula pyntip baka Sorkar Jylla kala dep pynshai ruh sha ka Sorkar Pdeng ba ka MRSSA kan nym ktah ia ka Article 19 jong ka Riti Synshar ka Ri.
“Ngi la dep pynshai sha ka Sorkar Pdeng. Ngi la kdew ba ha kane ka Ain, ngi la buh ba ka dei ka Registration ( pynrung kyrteng) bad kumta, ka dei ka jingai jingtip ia ki briew kiba wan rung shapoh ka Jylla. Kumta, kane hi kam ktah ia ka Article 19 jong ka Riti Synshar ka Ri” ula ong haba bynrap “Kine ki dei kiba ngi la pynshai bad ngi dang ap ia ka jubab jong ka Sorkar Pdeng halor kine ki jingpynshai jong ngi”.
Nalor kane, u Myntri Rangbah ula ong ba kan long kaba bakla ban ong ba ka Sorkar Jylla kam pat pyntreikam ia ka MRSSA, 2016 haba kynthoh ia ka jingkren jong ki nongialam ka Khasi Students’ Union (KSU) hadien ka jingialang bad u hynne ka sngi.
“Ngi la dep pynshai sha ki ia kaei ka jingsngewkhia jong ka Sorkar Pdeng. Halor ka jingpyntreikam ia ka ain tynrai MRSSA, 2016, ngi la dep pyntip ia kane ruh ba ka jingpyntreikam kala iaid bad haba ngi iakren hangne, ka jingregister ia ki briew ba na bar kala iaid ha ki shnong bapher bapher ka Shnong bad kila thaw ruh ia ki committee” ula ong bad bynrap “Kam dei kaba shisha ba khlem pat pyntreikam ia ka MRSSA, 2016. Ngi la pyntreikam ia ka bad ngi la thaw ia ki Committee. Hooid, ki lah ban don ki district kiba suki hynrei kam long kaba dei ban ong ba khlem pat pyntreikam”.
Ka KSU kala buh jingkylli ruh ia ka rai jong ka Sorkar Pdeng ban ai ILP ia kiwei ki Jylla ka thain Shatei Lam Mihngi hynrei em ia ka Meghalaya.
Halor kane, u Conrad ula ong “Ngi la dep ban pan jingpynshai ia kane na ka Sorkar Pdeng hynrei kaba kongsan ka long ia ki kyndon kiba don ban iada ia ka hok ki riewlum trai jylla ha kiba bun ki liang. Katto katne ki kyndon kila don hapoh ka Jylla kum ka nuksa ka Sixth Schedule bad kiwei ki Ain, ka Land Transfer Act bad kiwei kiwei”.
“Hynrei ha kiwei ki Jylla khamtam haba wan ka CAA, kiwei ki jaka kum ka Arunachal Pradesh, kim don satia ia ka Sixth Schedule bad kumta kala mih ka jingdawa ba ka dei ban don ka kynja ain bad namar ba ym lah ban ai ia ka Sixth Schedule ba bun palat ki jaidbynriew riewlum, kumta ka lynti ha katei ka por ka dei ka ILP. Kumjuh ruh, ha Manipur ruh ha ki valley area bad wat ha ki outer area, kim shym la don ka jingiada na ka Sixth Schedule” ula ong.
