Shillong, Jylliew 05 : U Myntri Rangbah ka Jylla Conrad K Sangma ha ka sngi Balang ula ong ba ka Sorkar Meghalaya Democratic Alliance (MDA) ba ialam da ka NPP, kan pyndep ia ka jingsynshar haduh ba kut ka samoi ba san snem.
U Conrad uba dei u National President ka NPP bad Chairman ka MDA, ula lum ia ka jingialang bad baroh ki paralok ba iatreilang hadien ka jingshah rem ha ka elekshon Lok Sabha 2024 na baroh artylli ki constituency ka Jylla.
Haba iakren bad ki nongthoh khubor, u Conrad ula ong ba ka jingbym lah ban lehbha jong ka NPP ka don bun bha ki daw bad ong “Ka dang kloi palat ia nga ban kynthoh eiei hynrei ki don shibun ki daw bad ngi la dep iashong ia katto katne ki jingialang ban iakren ia kane ka kam”.
“Nga la shong jingialang bad baroh ki paralok ba iatreilang. Nga dang shu dep shong jingialang bad baroh ki paralok khamtam ka UDP kaba la wan ban iakynduh ia nga hynne ka sngi bad iakynduh ruh ia ka BJP bad ngi la iakren halor ki ishu bapher bapher bad kumta ngi la ban jur ban gin pyndep ia ka jingsynshar jong kane ka samoi ba mynta. Ngin iatreilang ha ka lynti ba jai jai bad ngin iai bteng ban shakri ia ki paidbah kat kum ka rai ba kila ai ha ngi”.
“Ki paidbah ka Jylla kila ai ka rai ha ka elekshon Assembly bad halor kane ka rai la thaw ia ka Sorkar. Kumta nga sngewthuh ba ngi dei ban leh ia ka kam bala bynshet. Ka Elekshon 2023 ka dei ka elekshon jong ka Assembly bad ki paidbah kila jied bun eh ia ki seng sain pyrthei ba don ha ka Sorkar. Kila ai bun ki seat ban ia kaba ai ha u 2018 bad kumta, kane ka dei ka rai kaba la thaw ia ka Sorkar bad ka long kaba bakla shibun iano iano ruh ban kren ia kane” ula bynrap.
Haba kylli, u Myntri Rangbah ula ong “Hynrei haba iakren halor ki jyrsieh, ia ka kyntien jyrsieh la shu pyndonkam kat haba don da mano manor uh bad kano kano kaba jia, phi tip kila shu pynkylla jyrsieh beit. Dang shen kila don ba kdew ia ka jyrsieh kam jngohkai lane ka jyrsieh T.1300 klur, kumta ka suk eh ban pyndonkam ia ka kyntien jyrsieh Hynrei mynta, ymdon kawei ruh na kine ki jingkynnoh kiba don nongrim ia kaba la shem ruh na ki jingtohkit”.
“Ka long kaba suk eh ia ki briew ban kdew kti hynrei ki dei ban don ia ki jingshisha bad ki jingkhein jingdiah” ula ong.
