Shillong, Rymphang 19 : U Myntri Rangbah ka Jylla Conrad K Sangma ha ka sngi Nyngkong, ula ong ba ki kaiphod bad ki jinglum jingkhein ba iadei bad ka jingkhuid ka lyer ha Byrnihat, Ri-Bhoi kila pyni ba kala kham biang bad kam pat ju hiar sha u pud na kaba sniew sha kaba palat.
“Wat hapdeng ki kaiphod kiba pyni ia ka jingkhuid ka lyer kala kham biang, ngim shym la shim sting satia ia kane ka kam” ong u Conrad haba jubab ia ka call attention ha Iingdorbar Thaw Ain, kaba la wanrah da u MLA ka Jirang Bah Sosthenes Sohtun ban buh noh ia ka MSPCB office ha Byrnihat.
Ula ong ba ka Byrnihat ka dei kaba don ha syndak khappud ka Assam bad ki karkhana ki dei kiba don ha baroh arliang u pud.
U Conrad u pyntip ba ka Meghalaya State Pollution Control Board (MSPCB) kala pyndait ia ki kor, ka ban ai jingkhein ia ka jinglong ka lyer manla ka sngi.
“Namar kata, watla ngim buh ia ka Branch Office ka MSPCB, ka kor kala don ban peit ia ka jingjaboh ka lyer” ula ong haba bynrap “Ngi lah ban shong bishar ia ka jingtyrwa hynrei kumba nga ong ba da ka jingdon ki kor ki bor, ngi lah ban lum jingkhein watla kam don ka Ophis hapoh ka thain”.
U Conrad ula ong ba ka MSPCB kan pyndonkam ruh ia ki kor ka juk mynta ban peit thuh ia ka jingjaboh jong ka um.
