Shillong, Nohprah 09 : U Myntri Rangbah ka Jylla Conrad K Sangma ula kyntu ban sngewthuh lang halor ka kam ba iadei bad ka jingtih dewiong beain hapoh ka Jylla, haba pynpaw ba ka Sorkar kan hap ban pynbiang tarajur ia ka synshar khadar bad ka bishar ain ryngkat bad ka jingeh ha ka imlang sahlang bad ka jingsngew parabriew.
“Haba ngi khmih ia ka synshar khadar bad ka bishar kam, ngi donkam ruh ban sngewthuh ia ki jingeh ka imlang sahlang, ka kam kamai jakpoh, bad sngewthuh ia ka jingsngew para briew ba balei kane ka jia” ong u Conrad haba iakren bad ki lad pathai khubor ha ka sngi Ba-ar.
U Myntri Rangbah ula ban jur ba ka jingkhang syndet syndet ia ka jingtih dewiong, kaba la niew ba ka biang hakhmat ka ain ha kine ki 200 snem bala leit, kala ktah ia ka kamai jakpoh jong ki briew kiba shaniah ha kane ka kam da ki pateng la pateng.
“Kam dei kaba suk ia ki briew kiba shaniah ia ka kamai jakpoh na ka kam tih dewiong da ki spah snem bad ki bahaiing hasem kaba la iaid da ki pateng bad kynsan kynsan phi ong ia ki ba phim lah ban leh ia kane bad phim lah ban im iala ka jingim lane kyrshan ia ka iing ka sem lyngba kane ka kam” ula ong.
U Conrad ula kyntu ban don ka jingsngewthuh lang ia ka jinglong para briew halor kane ka kam,haba ong ba ka Sorkar ka dang wad ia ki lad kamai jakpoh da kiwei pat ia kine ki briew ba shah ktah.
“Kaei kaba kongsan ia ngi ka long ban peit ba suki pa suki, ngi dei ban ioh ia kiwei pat ki lad, bad kyrmen skhem, ngin sa shem bad ngin sa ioh ia ka rukom tih par kaba shngain bad kumjuh ruh ka jingshngain ia ki nongtih par” ula ong.
Haba pynpaw ba kam dei ka kam kaba suk ban shu pynbna beain shimiet shimiet ia ka jingtih dewiong, u Conrad ula ong “Nga la ong ia kane da ki spah sien….artylli kiei kiei ki don hangne- 2014 bad hashuwa da ki 200 snem, ka jingtih dewiong la leh da kaba tih thliew khnai bad da ki lak ki longiing longsem kila iadon bynta ha kane bad kynsan kynsan phi wan bad ong oh kajuh ka kam kaba biang bad shong ain la 200 snem lashai ka sngi kan long beain noh”.
U Myntri Rangbah ula ban jur ba ka jingkylla ba syndet syndet kala pynkyndit ia ki paidbah, khamtam ki nongtih dewiong, kiba la iaksaid ban im da kiwei pat ki kam. “Hooid, ka dei ka jingkyndit kaba khraw ia ki paidbah khamtam ki nongtih par. Kumta, kan shim por ia ki ba kin iehnoh ia kane ka kam kaba ka kamai jakpoh bad ka iing ka sem jong ki, ka shaniah tylli ha ka”.
U Conrad ula pynksan ia ki sienjam bala shim da ka Sorkar bad ong ba kila shim ia ki sienjam ban pyntreikam ia ka jingkhang tih dewiong beain, kynthup ka jingujor ia hajar tylli ki case, chargesheet bad khang dam ia ki par.
“Kat haba ioh jingtip bad ki jingshisha ba don ka jingtih dewiong beain, ka Sorkar kala shimkhia ban leh ia kaba donkam” ula ong.
